अंमळनेर ग्रामस्थांचा वाळु डेपोस विरोध; आमरण उपोषणाचा इशारा

नेवासा | तालुका प्रतिनिधी

शासनाच्या वाळु डेपोला नेवासा तालुक्यातील अंमळनेर ग्रामस्थांनी विरोध केला असून अंमळनेर येथील वाळू उपशाचा निर्णय रद्द न झाल्यास तहसील कार्यालयासमोर जनावरे व मुलाबाळासह आमरण उपोषण करण्याचा इशारा ग्रामस्थांनी दिला आहे .

वाळू ही शासनाची गौण खनिज संपत्ती असतांना आम्ही आमच्या आई प्रमाणे मुळा नदी पात्रातील वाळूचे संरक्षण केलेले आहे. एक खडा ही वाळूचा तस्करी या परिसरातून आम्ही करू दिलेली नाही.

नेवासा तालुक्यात इतरत्र वाळु साठे असतांना देखील संपूर्ण नेवासा तालुक्यातून केवळ अंमळनेर शिवारातील वाळू उचलण्याचा घाट सरकारी अधिकाऱ्यांनी बांधल्यामुळे या भागातील वाळू उपशामुळे आमच्या भागातील पाणी पातळी खोलवर जाऊन या परिसरात भयंकर दुष्काळ उद्भवण्याची परिस्थिती नाकारता येत नाही.

त्यामुळे या भागातील शासनाच्या नवीन धोरणानुसार वाळू डेपोला आमचा पूर्णपणे विरोध असून आम्ही लोकशाहीच्या मार्गाने यास विरोध करणार आहोत. वाळू डेपो निर्णय रद्द न केल्यास आमची जनावरं तसेच मुला बाळासह आम्ही नेवासा तहसील कार्यालयासमोर आमरण उपोषणाला बसणार असुन वेळ प्रसंगी आत्मदहन देखील करणार असल्याचा इशारा अमळनेर ग्रामस्थांनी निवेदनाद्वारे प्रशासनाला दिला आहे.

निवेदनावर सरपंच ज्ञानेश्वर ऐनर, सोपान सुपनर, अण्णासाहेब माकोणे, शिवाजी घावटे, शिवाजी आयनर, लक्ष्मण बोरुडे, चंद्रकांत माकोणे, एकनाथ पवार, गोरक्षनाथ सुपनर, खंडू कोळेकर, कर्णा साहेब, आनंद गावटे, नवनाथ डोईफोडे, अशोक मोरे, नानासाहेब बर्डे, माऊली पवार, हरिभाऊ बोरुडे, माऊली माकोणे, दत्तात्रय बाचकर आदींच्या सह्या आहेत.