गोठ्यातून एक लाखाच्या गाई चोरीला

गोठ्यातून एक लाखाच्या गाई चोरीला

अहमदनगर |प्रतिनिधी| Ahmednagar

शेतकर्‍याच्या गोठ्यात बांधलेल्या सुमारे एक लाख रुपये किमतींच्या दोन जर्सी गायी अज्ञात चोरट्यांनी चोरून नेल्या.

ही घटना नगर तालुक्यातील नेप्ती या ठिकाणी शनिवारी पहाटेच्या सुमारास घडली. याबाबत शेखर दत्तू महांडुळे यांनी दिलेल्या फिर्यादीवरून नगर तालुका पोलिसांनी अज्ञात चोरट्यांविरूध्द गुन्हा दाखल केला आहे.

याबाबत सविस्तर वृत्त असे, शहरापासून जवळच असलेल्या नेप्ती गावच्या शिवारात असलेल्या महांडूळे वस्तीवर शेखर महांडूळे यांचा गायींचा गोठा असून महांडूळे यांचे बंधू रामदास हे शुक्रवारी (दि. 26) रात्री 11 वाजण्याच्या सुमारास गोठ्यात बांधलेल्या गायींना चारा टाकून घरात झोपण्यास गेले. त्यानंतर शनिवारी (दि.27) पहाटे पाच वाजण्याच्या सुमारास ते पुन्हा गायींना चारा टाकण्यासाठी गोठ्याकडे गेले असता गोठ्यातील तीन गायींपैकी दोन गायी तेथे त्यांना दिसल्या नाहीत.

याबाबत त्यांनी कुटुंबियांना माहिती दिल्यानंतर महांडूळे कुटुंबियांनी परिसरात गायींचा शोध घेतला. परंतु त्या मिळून आल्या नाहीत. ही बाब त्यांनी एमआयडीसी पोलिसांना कळवल्यानंतर पोलीस घटनास्थळी आले.

त्यांनी पाहणी करुन या घटना नगर तालुका पोलीस ठाण्याच्या हद्दीत येत असल्याचे त्यांनी महांडूळे कुटुंबियांस सांगितले. महांडूळे हे दिव्यांग असल्याने त्यांना नगर तालुका पोलीस ठाण्यात जाणे अडचणीचे होते, त्यामुळे एमआयडीसी पोलिसांनी त्यांची फिर्याद घेऊन ती नगर तालुका पोलिसांकडे पाठविली.

logo
Latest Marathi News, Marathi News Paper, Breaking News In Marathi, Marathi Batmya Live
www.deshdoot.com