<p><strong>कोंढवड |वार्ताहर| Kodhawad</strong></p><p>राहुरी तालुक्यातील कोंढवड येथील मुळा नदीवरील पुलाला मोठे भगदाड पडले आहे. त्यामुळे हा पुल वाहतुकीसाठी धोकादायक झाला आहे. </p>.<p>या पुलाची तात्काळ दुरूस्ती करावी, अशी मागणी कोंढवड, शिलेगाव व पंचक्रोशीतील ग्रामस्थांनी केली आहे.</p><p>कोंढवड येथील मुळा नदीवरील पुल पूर्वभागासाठी दळणवळणाच्या दृष्टीने अत्यंत महत्वाचा आहे. परिसरातील अनेक गावांना जोडणारा हा पुल असून या पुलाला तांदुळवाडीच्या बाजूने मोठे भगदाड पडले असल्याने हा पुल शेवटच्या घटका मोजत असल्याचे चित्र निर्माण झाले आहे. हे भगदाड वरून जरी लहान दिसत असले तरी आतून भगदाडाची पोकळी मोठी आहे. </p><p>तसेच या पुलावरून सध्या ऊस वाहतुकीची साधने मोठी कसरत करून जात आहेत. या पडलेल्या भगदाडामुळे एखादा मोठा अनर्थ होण्याचा धोका निर्माण झाला असून वाहनचालकांना आपला जीव मुठीत धरून या पुलावरून प्रवास करावा लागत आहे. तरी या पुलाची संबंधित विभागाने पाहणी करुन दुरूस्ती करावी, अशी मागणी सरपंच आशादेवी म्हसे, शिलेगावचे सरपंच संदिप म्हसे, उत्तमराव म्हसे, साहेबराव म्हसे, संभाजी पेरणे, राहुल म्हसे, विजय कातोरे, दिलीप म्हसे, भाऊसाहेब देवरे, इंद्रभान म्हसे, डॉ. दिलीप म्हसे, तानाजी नेहे, लक्ष्मण म्हसे, रमेश म्हसे, पोपट म्हसे, दत्तू माळवदे, सुनील हिवाळे, रवींद्र म्हसे, शिवाजी औटी, पांडू म्हसे, संजय म्हसे यांनी केली आहे.</p>
