<p><strong>श्रीरामपूर |प्रतिनिधी| Shrirampur</strong></p><p>श्रीरामपूर मतदारसंघातील श्रीरामपूर व देवळाली प्रवरा नगरपरिषद यांच्यासाठी आवश्यक त्या रस्ता दुरुस्तीसाठी निधी उपलब्ध करून द्यावा, या मागणीचे निवेदन आ. लहू कानडे यांनी नगर विकासमंत्र्यांना दिले.</p>.<p>यामध्ये श्रीरामपूर नगरपरिषदेसाठी 24 कोटी तर देवळाली नगरपरिषदेसाठी सात कोटी रुपयांच्या निधीची मागणी करण्यात आली आहे.</p><p>नगरविकास व सार्वजनिक बांधकाम मंत्री एकनाथ शिंदे यांनी अहमदनगर येथे महापालिका व नगरपरिषदा यांच्या कामाचा आढावा घेण्यासाठी बैठक घेतली. यासाठी लोकप्रतिनिधी म्हणून आमदार लहू कानडे यांनी उपस्थित राहून आतापर्यंत केवळ दोन कोटी रुपये प्राप्त झाल्याकडे मंत्र्यांचे लक्ष वेधले. </p><p>श्रीरामपूर येथील विस्तीर्ण अशा पाणी साठवण तलावाला आच्छादन नसल्याने गाळमिश्रित पाणी श्रीरामपूरकरांना प्यावे लागते. त्यासाठी नगर विकास विभागाने निधी उपलब्ध करून द्यावा, तसेच घनकचरा यावर वेगाने प्रक्रिया होत नसल्याने कचर्याचे ढीग साचून आरोग्याचे प्रश्न निर्माण होत आहेत. सदर चे प्रश्न सोडवण्यासाठी नगर विकास विभागाने सर्वतोपरी सहकार्य करावे, अशी मागणी आ. कानडे यांनी केली.</p><p>नगर विकास मंत्री ना. शिंदे यांनी नवीन नगररचना नियमावली व नगरपालिका कामकाजाची माहिती देण्यासाठी सर्व नगर पालिकेचे पदाधिकारी व लोकप्रतिनिधी यांच्या समवेत अधिकार्यांची बैठक बोलावली होती.</p>
