मिरीत तिरंगी लढतीची शक्यता

करंजी |वार्ताहर| Karanji

पाथर्डी तालुक्यात राजकीयदृष्ट्या महत्त्वपूर्ण मानल्या जाणार्‍या मिरी ग्रामपंचायतीसाठी तिरंगी लढतीची शक्यता वर्तवण्यात येत आहे.

त्यादृष्टीने स्थानिक पुढार्‍यांच्या जोरदार हालचाली सुरू झाल्या आहेत. मिरी ग्रामपंचायतीमध्ये साडेचार हजार मतदार असून पाच प्रभाग आहेत. यातून 15 सदस्यांना निवडून द्यावयाचे आहे. निवडणुकीच्या माध्यमातून गावातील अनेक तरुणांची राजकीय एन्ट्री होणार असल्याची चर्चा रंगली आहे.

मागील पंचवार्षिकला सरपंचपद सर्वसाधारण वर्गासाठी होते. तरीही इतर प्रवर्गातील व्यक्तींनी चार वर्षे सरपंचपद पदरात पाडून घेतले. त्यामुळे पाच वर्षात मिरी गावाला तीन सरपंच पहायला मिळाले. आता होऊ घातलेल्या निवडणुकीत सरपंच पदाचे आरक्षण निवडणुकीनंतर जाहीर होणार असल्याने सर्वच स्थानिक पुढार्‍यांना प्रत्येक सदस्य सरपंच पदाचा दावेदार म्हणूनच निवडणूक करावी लागणार आहे.

यंदाची निवडणुकीत तिरंगी लढत होणार असून यामध्ये मिरीचे पोपटराव गवळी, ग्रामपंचायत सदस्य एकनाथ झाडे, माजी सरपंच संतोष शिंदे, शिवसेनेचे नेते भागिनाथ गवळी, आसाराम भगत, संजय नवल, नामदेव दारकुंडे, डॉ. बबनराव नरसाळे, संभाजी दारकुंडे, रेवजी कोरडे, बापूसाहेब कोरडे, वसंत कोरडे, विजय गवळी, या प्रमुख नेतेमंडळीच्या माध्यमातून स्वतंत्र पॅनल उभा केला जाणार आहे.

त्याचबरोबर गावचे माजी सरपंच साहेबराव गवळी, माजी उपसभापती महादेव कुटे पाटील, माजी उपसरपंच अण्णासाहेब शिंदे, राजू इनामदार, जाकीर पटेल, आदिनाथ तागड, आसाराम भगत, रंभाजी गुंड, भाऊसाहेब तोगे, काळू मिरपगार, अशोक झाडे यांच्यावतीने देखील स्वतंत्र पॅनल उभा केला जाणार आहे. मिरी पंचायत समिती गणाचे सदस्य राहुल गवळी हे देखील या निवडणुकीत पूर्ण ताकदीनिशी उतरणार असून गवळी यांच्यासोबत चेअरमन नंदू बनकर, ग्रामपंचायत सदस्य बंडू झाडे, विजय गुंड, माणिकराव गवळी, राजू शेख, नरवडे सर यांच्यावतीने पॅनल करून निवडणुकीच्या रिंगणात उतरणार आहेत.