आजोळी आलेल्या अल्पवयीन मुलीसोबत गैरवर्तन

अहमदनगर |प्रतिनिधी| Ahmednagar

सुट्टीसाठी आजोळी नगरला आलेल्या 13 वर्षीय अल्पवयीन मुलीचा पाठलाग करून विनयभंग केल्याची घटना सावेडी उपनगरात घडली. पीडित अल्पवयीन मुलीच्या आईने तोफखाना पोलीस ठाण्यात दिलेल्या फिर्यादीवरून दुचाकीवरील (एमएच 16 वाय 2099) अनोळखी तरुणाविरूध्द विनयभंग, पोक्सो कलमान्वये गुन्हा दाखल करण्यात आला आहे.

फिर्यादी पाथर्डी तालुक्यातील असून त्यांची आई सावेडी उपनगरात राहतात. फिर्यादीच्या मुलीला सुट्टी असल्याने ती आठ दिवसांपूर्वी सावेडीत आजीकडे आली होती. ती 6 जून रोजी सकाळी घराच्याबाहेर पडली असता पाऊलबुध्दे शाळेजवळून रस्त्याने जात असताना दुचाकीवरील अनोळखी तरूणाने तिचा पाठलाग केला. तसेच 7 जून रोजीही तो तरुण मुलीच्या जवळ आला व त्याने तिला नाव विचारून मोबाईल नंबर मागितला.

तसेच 11 जून रोजी मुलगी मंदिरात दर्शनासाठी जात असताना त्या तरुणाने तिचा पुन्हा पाठलाग केला. जवळ येऊन, मला तु खुप आवडतेस, तुझा मोबाईल नंबर दे, असे म्हणून गाडीवरून खाली उतरून हात धरून जवळ ओढले व लज्जा उत्पन्न होईल, असे वर्तन केले. सदरचा सर्व प्रकार मुलीने फिर्यादीला सांगितला. फिर्यादीने नगर गाठून पोलीस ठाण्यात गुन्हा दाखल केला आहे. पोलीस त्या मुलाचा शोध घेत आहेत.