<p><strong>कोपरगाव (प्रतिनिधी) -</strong> </p><p>शहराच्या विकासाच्या दृष्टीने अत्यंत महत्वाच्या विकासकामांच्या निविदा कोल्हे गटाच्या नगरसेवकांनी बहुमताच्या जोरावर</p>.<p>नामंजूर केल्या आहे. या नामंजूर करण्यात आलेल्या विकासकामांचे ठराव जिल्हाधिकार्यांनी त्यांच्या अधिकारात कलम 308 अन्वये मंजूर करण्यासाठी कोपरगाव नगरपरिषदेने जिल्हाधिकारी कार्यालयाकडे पाठविल्या आहे. याबाबत जिल्हाधिकार्यांनी लक्ष घालून विकास कामांचे ठराव तातडीने मंजूर करावे अशी मागणी कोपरगाव शहरातील नागरिकांच्या वतीने राष्ट्रवादी काँग्रेस, शिवसेनेच्या नगरसेवकांसह काँग्रेस, मनसे तसेच विविध संघटनांच्या पदाधिकार्यांनी जिल्हाधिकारी डॉ. राजेंद्र भोसले यांची भेट घेवून त्यांच्याकडे केली.</p><p>निवेदनात म्हटले आहे, कोपरगाव नगरपरिषदेच्या स्थायी समितीच्या सभेत बांधकाम विभाग, पाणी पुरवठा, आरोग्य आदी विभागांच्या विकास कामांच्या निविदा मंजुर करण्याबाबतचे विषय मंजुरीसाठी ठेवण्यात आले होते. यामध्ये कोपरगाव शहरातील नागरीकांच्या दृष्टीने मुख्य बाजारपेठ, तसेच तहसील कार्यालय, पंचायत समिती या व्यतिरिक्त विविध शासकीय कार्यालयाकडे जाणारे रस्ते व कोपरगाव शहरातील पाच प्रभागांना जोडणार्या रस्त्यांचा समावेश होता. </p><p>या रस्त्यांचा शहरातील हजारो नागरिकांना तसेच शाळा महाविद्यालयातील विद्यार्थ्यांना उपयोग होणार आहे. नागरिकांचे आरोग्यहित लक्षात घेवून पाणी पुरवठा करणार्या टाक्या स्वच्छतेचा विषय देखील बहुमताचा चुकीचा वापर करून सत्ताधारी नगरसेवकांनी या निविदा अर्धवट माहितीच्या आधारे नामंजूर केल्यामुळे शहरविकास थांबला आहे. समाजहिताचा विचार करून आपण आपल्या विशेष अधिकारात ही नामंजूर विकासकामे मंजूर करावे असे या निवेदनात म्हटले आहे.</p><p>यावेळी विकासकामांचे ठराव मंजूर करावे याबाबतचे कोपरगाव शहरातील जवळपास नऊ हजार नागरिकांच्या सह्यांचे निवेदनही जिल्हाधिकारी डॉ. राजेंद्र भोसले यांना देण्यात आले.</p><p>यावेळी राष्ट्रवादी काँग्रेस पक्षाचे जिल्हा कार्याध्यक्ष संदीप वर्पे, शहराध्यक्ष सुनील गंगूले, नगरसेवक गटनेते वीरेन बोरावके, मंदार पहाडे, संदीप पगारे, हाजी महेमुद सय्यद, राजेंद्र वाकचौरे, अजीज शेख, शिवसेना उपशहरप्रमुख प्रफुल्ल शिंगाडे, काँग्रेसचे शहराध्यक्ष सुनिल साळुंखे, मनसे तालुकाध्यक्ष अनिल गायकवाड, मनसेचे दिव्यांग जिल्हा कार्याध्यक्ष योगेश गंगवाल, सामाजिक कार्यकर्ते मनोज शिंदे आदी उपस्थित होते.</p>
