दोघा भावांवर चाकूने खुनी हल्ला

अहमदनगर |प्रतिनिधी| Ahmednagar

किरकोळ कारणातून झालेल्या वादात दोघा भावांवर चाकूने हल्ला करून जीवे मारण्याचा प्रयत्न झाला. नगर शहरातील कोठला मस्जिद येथे बुधवारी दुपारी ही घटना घडली. या हल्ल्यात राजीक युनूस शेख व शहबाज रजाक शेख (दोघे रा. लाइन बाजार, औरंगाबाद रोड, अहमदनगर) हे जखमी झाले आहेत. त्यांच्यावर नगर शहरातील खासगी रुग्णालयात उपचार सुरू आहेत.

उपचारादरम्यान राजीक शेख यांनी तोफखाना पोलिसांना दिलेल्या जबाबावरून चौघांविरूध्द भादंवि कलम 307, 324, 323, 504, 34 प्रमाणे गुन्हा दाखल करण्यात आला आहे. मतीन इलियास सय्यद, शहबाज राजाक शेख, उबेद इलियास सय्यद, परवेज इलियास सय्यद (चौघे रा. कोठला मस्जिद, तोफखाना, अहमदनगर) अशी गुन्हा दाखल झालेल्या आरोपींची नावे आहेत. बुधवारी दुपारी राजीक शेख व शहबाज शेख हे त्यांच्या बहिणीच्या घराकडून तोफखाना पोलीस ठाण्याकडे जात असताना दुपारी साडेबारा वाजेच्या सुमारास कोठला मस्जिद समोर रोडने जात असताना मतीन सय्यद, शहबाज राजाक शेख, उबेद सय्यद व परवेज सय्यद हे चौघे तेथे आले. त्यांनी राजीक व शहबाज यांना थांबविले.

मतीन शिव्या देत राजीक यांच्या अंगावर धावून गेेला. त्याच वेळी उबेद याने त्याच्याकडील चाकूने राजीक याच्या डोक्यावर वार करून त्यांना जीवे मारण्याचा प्रयत्न केला. राजीक सोबत असलेल्या त्याचा भाऊ शहबाज रजाक शेख याच्यावरही आरोपींनी चाकूने वार करत त्याला जीवे मारण्याचा प्रयत्न केला. राजीक व त्याचा भाऊ शहबाज यांना आरोपींनी लाकडी दांडक्यानेही मारहाण केली असल्याचे फिर्यादीत म्हटले आहे. हा वाद सुरू असताना लोकांची गर्दी जमा झाल्याने हल्लेखोर चौघे घटनास्थळावरून पसार झाले. पुढील तपास पोलीस उपनिरीक्षक धनराज जारवाल हे करीत आहेत.