<p><strong>संगमनेर |प्रतिनिधी| Sangmner</strong></p><p>जोर्वे विविध कार्यकारी सोसायटीचे माजी व्हाईस चेअरमन व प्रगतिशील शेतकरी ज्ञानदेव देवराम थोरात यांच्या गाईने </p>.<p>काल तीन वासरांना जन्म दिला. त्यामुळे या परिसरात कुतुहलाचे वातावरण निर्माण झाले असून अनेकांनी ही वासरे पाहण्यासाठी याठिकाणी गर्दी केली.</p><p>संगमनेर रोडवर थोरात वस्ती वर राहणार्या ज्ञानदेव देवराम थोरात यांनी राज्याचे महसूल मंत्री नामदार बाळासाहेब थोरात यांच्या नेतृत्वाखाली काम करताना सहकाराबरोबर प्रगतिशील शेतकरी म्हणून लौकिक मिळवला. </p><p>याचबरोबर त्यांनी गायी व दूध धंद्यामध्ये चांगले यश मिळवले आहे. त्यांच्या गाई गोठ्यात आज पाच गाई असून या समृद्ध परंपरेत एका लक्ष्मी गाईने तीन वासरांना जन्म दिल्याने हा एक मोठा योगायोग समाजला जात आहे. ज्ञानदेव थोरात यांनी शेतीला दुग्ध व्यवसायाची जोड देत भरभराट निर्माण करणार्या या व्यवसायातून त्यांच्या या गाईने दिलेल्या तीन वासरांमुळे आणखी समृद्धी आली आहे.</p><p>ही बातमी जोर्वे व परिसरात वार्यासारखी पसरताच अनेक बालगोपाळ व दुग्ध व्यवसायातील जाणकारांनी हे तिळे वासरे पाहण्यास गर्दी केली. काळा व पांढरा रंग असलेल्या तीनही वासरांकडे पाहताना प्रत्येकाच्या डोळ्यांमध्ये कुतूहल जाणवत होते.</p><p>यावेळी ज्ञानदेव थोरात म्हणाले, आधिक मासाचा हा महिना असून यामध्ये झालेली ही तिळे वासरे ही आनंदाची व पूर्वपुण्याई आहे. त्यांचे आपण चांगले संगोपन करणार असून यांना गंगा, यमुना व सरस्वती हे नाव देण्यात आले आहे.</p><p>यावेळी शेतकी सहकारी संघाचे मॅनेजर अनिल थोरात, सुनील थोरात, पशुवैद्यकीय अधिकारी डॉ. प्रविण काकड यांच्यासह समर्थ थोरात, आराध्या थोरात, शौर्य थोरात, बालू थोरात यांनी टाळ्यांच्या कडकडाटात वासरांचे स्वागत केले.</p>
