अहमदनगर |प्रतिनिधी| Ahmednagar
जखणगाव (ता. नगर) शिवारातील महादेव मंदिराच्या पाठीमागे सुरू असलेल्या जुगार अड्ड्यावर छापा टाकून 76 हजार रूपयांचा मुद्देमाल जप्त करण्यात आला. बुधवारी सायंकाळी नगर तालुका पोलिसांनी ही कारवाई केली. या प्रकरणी सहा जणांविरूध्द नगर तालुका पोलीस ठाण्यात गुन्हा दाखल करण्यात आला आहे.
मुनीर मासूम शेख, कदीर मासूम शेख, नजीर मासूम शेख, अहमद उमराव शेख, कुंडलिक कोंडिबा देवकर (सर्व रा. जखणगाव), बाळासाहेब लक्ष्मण सोनवणे (रा. हिंगणगाव ता. नगर) यांच्याविरूध्द गुन्हा दाखल झाला आहे. जखणगावातील महादेव मंदिरामागे काही जण जुगार खेळत आहेत, अशी माहिती नगर तालुका पोलीस ठाण्याचे सहाय्यक पोलीस निरीक्षक राजेंद्र सानप यांना मिळाली.
त्यांच्या नेतृत्वाखालील पथकाने बुधवारी सायंकाळी पाच वाजता छापा टाकला. पकडल्यांकडून जुगाराचे साहित्य, दोन हजार 100 रूपये रोख आणि तीन दुचाकी असा 76 हजार 610 रूपयांचा मुद्देमाल जप्त करण्यात आला. निरीक्षक सानप यांच्या मार्गदर्शनाखाली पोलीस अंमलदार खेडकर, घोरपडे, राहुल शिंदे, भालसिंग, टकले यांनी ही करवाई केली.