अवैध दारु विक्रेत्यांवर छापे

अहमदनगर |प्रतिनिधी| Ahmednagar

नगर तालुका पोलिसांनी अवैध दारू विक्रेत्याविरूद्ध मोहिम उघडली आहे. वाटेफळ, रुईछत्तीसी आणि निमगाव वाघा येथे छापे टाकून 44 हजार 325 रूपयांची दारू जप्त केली आहे. याप्रकरणी तीन स्वतंत्र गुन्हे दाखल करण्यात आले आहेत.

सहायक पोलिस निरीक्षक शिशिरकुमार देशमुख यांच्या मार्गदर्शनाखाली उपनिरीक्षक युवराज चव्हाण, उपनिरीक्षक रणजित मराग, पोलिस अंमलदार राहुल शिंदे, कमलेश पाथरुट, संदीप जाधव यांच्या पथकाने तालुक्यातील अवैध दारू विक्रेत्यांवर छापे टाकले. वाटेफळ गावच्या शिवारात छापा टाकून आरोपी सचिन अशोक भवर (वय 33, रा. वाटेफळ) याच्या ताब्यातून 5 हजार 175 रुपये किंमतीची विविध कंपनीच्या देशी व विदेशी दारू जप्त करण्यात आली.

रुईछत्तीसी गावामधील हॉटेल दीपाली येथे छापा टाकून आरोपी सोमनाथ सुनील जगदाळे (वय 23, रा. रुईछत्तीसी) याच्या कब्जातून 4 हजार 650 रुपयांची दारू जप्त करण्यात आली. निमगाव वाघा गावच्या शिवारात एका घराच्या आडोशाला एक गावठी हातभट्टीचे रसायन व तयार हातभट्टीची दारू असा 34 हजार 500 रूपये किंमतीचा मुद्देमाल जागेवरच नष्ट करण्यात आला.