दोन लाखांचा गुटखा, सुगंधी तंबाखू पकडली

अहमदनगर |प्रतिनिधी| Ahmednagar

सावेडी उपनगरातील समतानगरमध्ये घराच्या पडवीत विक्रीसाठी साठवून ठेवलेला गुटखा व सुगंधी तंबाखू स्थानिक गुन्हे शाखेच्या पोलिसांनी पकडली. एकूण एक लाख 92 हजार 302 रुपये किमतीचा गुटखा व सुगंधी तंबाखू जप्त केली आहे. पोलिसांनी शनिवारी ही कारवाई केली. याप्रकरणी तोफखाना पोलीस ठाण्यात गुन्हा दाखल झाला आहे. पोलीस अंमलदार संदीप पवार यांनी फिर्याद दिली आहे.

अंकुश अविनाश भापकर (वय 29 रा. राजमाता कॉलनी, समतानगर, सावेडी) असे गुन्हा दाखल झालेल्यांचे नाव आहे. त्याला अटक करण्यात आली असून न्यायालयाने दोन दिवसांची पोलीस कोठडी दिली आहे. अंकुश भापकर याने त्याच्या घरासमोरील पडवीमध्ये सुगंधी तंबाखू व गुटखा विक्री करण्याच्या उद्देशाने साठवून ठेवला आहे, अशी माहिती पोलीस निरीक्षक अनिल कटके यांना मिळाली होती.

त्यांनी पोलीस अंमलदार पवार, दिनेश मोरे, संदीप घोडके, शंकर चौधरी, सचिन आडबल, रणजित जाधव, विजय धनेधर यांना कारवाई करण्याच्या सूचना दिल्या. पोलिसांच्या पथकाने दोन पंचासमक्ष दुपारी समतानगरमधील भापकर याच्या घरावर छापा टाकला असता त्यांना पडवीमध्ये साठवून ठेवलेला एक लाख 92 हजार 302 रुपये किमतीचा गुटखा व सुगंधी तंबाखू मिळून आली. पोलिसांनी सर्व मुद्देमाल जप्त केला असून भापकरला अटक केली आहे. अधिक तपास तोफखाना पोलीस करीत आहेत.