<p><strong>अहमदनगर |प्रतिनिधी| Ahmednagar</strong></p><p>जुनी पेन्शन योजना लागू होण्यास अडथळा ठरणारी 10 जुलैची अधिसूचना रद्द करण्याच्या निर्णयावर गुरूवारी</p>.<p>शिक्षक व पदवीधर आमदारांच्या बैठकीत शिक्षणमंत्री वर्षाताई गायकवाड यांनी सही केली. या निर्णयाचे स्वागत करीत जुनी पेन्शन कोअर कमिटीच्या वतीने सावेडी नाका चौकात पेढे वाटून जल्लोष करण्यात आला.</p><p>यावेळी कोअर कमिटीचे राज्य सचिव महेंद्र हिंगे, माध्यमिक शिक्षक संघटनेचे सचिव आप्पासाहेब शिंदे, शिक्षक परिषदेचे नेते बाबासाहेब बोडखे, क्रीडा महासंघाचे राज्य अध्यक्ष राजेंद्र कोतकर, रमाकांत दरेकर, बद्रीनाथ शिंदे, बाबासाहेब शिंदे, आनंदा नरसाळे, शिवाजी घाडगे, विठ्ठल काळे, नवनाथ घुले, बबनराव शिंदे, चंद्रकांत डाके, अनिल गायकवाड, भाऊसाहेब जिवडे, जयश्री देशपांडे, मुरलीधर मेहेत्रे, कांचन मिरपगार आदि शिक्षक उपस्थित होते.</p><p>10 जुलै 2020 रोजी शालेय शिक्षण व क्रीडा विभागाने महाराष्ट्र खाजगी शाळा कर्मचारी (सेवेच्या शर्ती) नियमावली 1981 मधील सेवाशर्तीमध्ये बदल सुचवणारी अधिसूचना जारी केली होती. या अधिसूचनेत सुचवल्याप्रमाणे बदल झाल्यास राज्यातील 1 नोव्हेंबर 2005 पूर्वी नियुक्त हजारो मुख्याध्यापक, शिक्षक शिक्षकेतर कर्मचारी यांचा जुनी पेन्शन मिळण्याचा अधिकार संकटात येणार होता. अखेर शिक्षण मंत्री गायकवाड यांनी ही अधिसूचना रद्द करत असल्याचे सांगितलं आहे.</p><p>मंत्रालयात शिक्षणमंत्र्यांसोबत शिक्षक, पदवीधर आमदार यांच्या सोबत बैठक पार पडली, त्यात हा निर्णय झाला. हा अडथळा दूर झाला असल्याने ज्यांची मूळ नेमणूक दि. 1 नोव्हेंबर 2005 पूर्वीची आहे त्या सर्वांनाच जुनी पेन्शन योजना लागू करण्याबाबत शासनाने आता विनाविलंब, विनाअट कार्यवाही करावी, अशी मागणी यावेळी करण्यात आली.</p><p>या प्रश्नांवर पाठपुरावा करणारे डॉ. सुधीर तांबे, आ. कपिल पाटील, आ. विक्रम काळे, आ.सतीश चव्हाण, आ. जयंत आसगावकर, आ. अभिजित वंजारी, प्रधान सचिव वंदना कृष्णा, शिक्षण आयुक्त, शिक्षण संचालक आदिंनी विशेष सहकार्य केल्याने या सर्वांचे शिक्षकांच्या वतीने आभार मानण्यात आले आहे.</p>
