आयजींच्या पथकाचा चास शिवारात जुगार अड्ड्यावर छापा

अहमदनगर |प्रतिनिधी| Ahmednagar

विशेष पोलिस महानिरीक्षक बी.जी.शेखर पाटील यांच्या विशेष पथकाने नगर-पुणे रस्त्यावरील चास शिवारातील हॉटेल भोलेनाथ आवारात नेटच्या शेडमध्ये सुरू असलेल्या जुगार अड्ड्यावर छापा टाकून 9 जणांविरूध्द कारवाई केली. या कारवाईत 75 हजार 670 रुपयांचा मुद्देमाल हस्तगत करण्यात आला आहे. ही कारवाई आज पहाटे सव्वादोनच्या सुमारास करण्यात आली.

विशेष पथकातील पोलीस निरीक्षक बापू रोहोम, अंमलदार रवींंद्र शिलावट, बशीर गुलाब तडवी, शेख शकील अहमद, प्रमोद मंडलीक, मनोज दुसाने, सुरेश टोंगारे, सचिन अंधारे, कपील गायकवाड यांच्या पथकाने ही कारवाई केली. सुमन विरेंद्र मिश्रा (वय 42, ठाणे भाईंदर वेस्ट, सध्या रा. शिर्डी, ता. राहाता), सचिन भगवान गायकवाड (वय 34, रा. कान्कुरी रोड, आंबेडकर नगर, शिर्डी), हासिम अली खान (वय 45, रा. वसई पालघर, सध्या रा. शिर्डी), अख्तर अहमद नूर अहमद (वय 24, रा. मंसूरगंज, उत्तरप्रदेश, सध्या रा. शिर्डी), बाळु भगवान राजगुरू (वय 55, रा. मानुरवाडी, वडाळा पूर्व, मुंबई शहर), दिनेश रामकृष्ण माळगांवकर (वय 45, रा. लोटस कॉलनी, अब्दुल हमीद मार्ग, गोवंडी, मुंबई तसेच पाहिजे असलेले आरोपी अनिस भाई (रा. औरंगाबाद, पूर्ण नाव माहित नाही), प्रदीप सरोदे (रा. शिर्डी, पूर्ण नाव माहीत नाही), हॉटेल मालक विजय लांडगे (रा. नगर, पूर्ण नाव व पत्ता माहित नाही), असे नगर ते पुणे प्रवासादरम्यान खासगी लक्झरी बसेसमधील चहा नाष्टासाठी थांबणार्‍या प्रवाशांना बोलावून बेकायदेशीरपणे त्याप्रवासी लोकांना जिंकण्याचे प्रलोभन दाखवून तीन पत्त्यांवर लोकांकडून पैसे लावून त्या पत्त्यापैकी एका पत्त्यावर असलेल्या 1 या चित्राचा पत्ता काढून त्यावर हार जितीचा जुगाराचा खेळ खेळताना व खेळविताना 75 हजार 670 रुपयांच्या मुद्देमालासह मिळून आले, असे फिर्यादीत म्हटले आहे. पोहेकॉ शकील शेख यांनी फिर्याद दिली आहे.