विजवाहक तारेचा धक्का लागून शेतमजुरासह म्हैशीचा मृत्यू

शेवगाव |शहर प्रतिनिधी| Shevgav

तालुक्यातील एरंडगाव येथे तुटलेल्या विद्युत वाहक तारेचा धक्का लागून एक शेतमजूर व म्हैस जागेवर ठार झाले तर एकजण गंभीर जखमी झाल्याची घटना बुधवारी ( दि.14 ) सकाळी घडली.

या घटनेत महादेव लक्ष्मण पूंड (50, रा. एरंडगाव) हे ठार झाले. तर भाऊसाहेब रतन बनकर (42, रा. एरंडगाव) हे जखमी झ झाले आहेत. पोलीसांनी दिलेल्या माहितनुसार, पूंड हे सकाळी साडेसातला  ऊसाच्या शेतात पाणी भरत होते. यावेळी गोठयातील म्हैस सुटून ऊसाच्या शेतात घुसली. म्हैस तेथे तूटलेल्या विद्युत वाहक तारेत अडकून कोसळली. म्हैस  कां पडली म्हणून पहाण्यासाठी पुंड धावतच म्हशी जवळ गेले.

तेव्हां त्यांनाही तारेचा धक्का लागून तेही कोसळले. यावेळी काही अंतरावर असलेल्या भाऊसाहेब रतन बनकर यांनाही शॉक बसून ते लांब फेकले गेले. पुंड व बनकर यांना तातडीने शेवगाव येथील नित्यसेवा रुग्णालयात हलविण्यात आले. मात्र पुंड याचा मृत्यू झाल्याचे डॉक्टरांनी घोषित केले. तर बनकर यांच्यावर उपचार सुरू आहेत.

शवविच्छेदनानंतर सायंकाळी उशिरा पुंड यांच्यावर एरंडगाव येथे शोकाकुल वातावरणात अंत्यसंस्कार करण्यात आले. शेवगाव पोलीस ठाण्यात या संदर्भात अकस्मात मृत्यूची नोंद करण्यात आली. पोलीस निरीक्षक विलास पुजारी यांचे मार्गदर्शनाखाली हवालदार बाबासाहेब शेळके तपास करीत आहेत.