<p><strong>शिर्डी l शहर प्रतिनिधी</strong></p><p>शिर्डी शहरात मोकाट कुत्र्यांनी चावा घेतला असून शिर्डी नगरपंचायतचे सत्ताधारी गट आणि मुख्याधिकारी अत्यंत निष्क्रिय आहे. </p>.<p>दरम्यान या मोकाट कुत्र्यांना पकडण्यासाठी नगरपंचायत प्रशासनाने कोणतीही व्यवस्था केली नसल्याने अखेर नगरपंचायतमध्ये कुत्रे आणुन सोडले असून नागरीकांनीही आपल्या परिसरातील कुत्रे नगरपंचायतमध्ये आणून सोडल्यास माझ्याकडून वैयक्तिक बक्षीस देण्यात येणार असल्याचे शिवसेना नेते कमलाकर कोते यांनी सांगितले.</p>.<p>दरम्यान शिर्डी आंतरराष्ट्रीय तिर्थक्षेत्र असल्याने याठिकाणी नगरपंचायतच्या माध्यमातून शहर स्वच्छतेबरोबरच शहरात वाढलेल्या कुत्र्यांचा बंदोबस्त करणे गरजेचे झाले आहे. शहरातील अनेक उपनगरात मोठ्या प्रमाणावर कुत्र्यांची संख्या वाढलेली आहे. याप्रश्नी कमलाकर कोते यांनी नगरपंचायतच्या सत्ताधारी गटावर कुत्र्यांचा बंदोबस्त प्रकरणाविषयी ताशेरे ओढले. यावेळी त्यांनी सांगितले की सत्ताधारी आणी मुख्याधिकारी निष्क्रिय असून गल्लीगल्लीत मोकाट कुत्रे साईभक्तांना, आबालवृद्धांना व लहान मुलांना चावा घेण्याच्या घटना घडल्या आहे.शहरात कुत्र्यांना वाचविण्याच्या नादात अनेक छोटे मोठे अपघात झाले आहे. यामध्ये लहान मुलांना शाळेत जातांना कुत्र्यांनी चावा घेतला आहे. यामुळे शहरातील नागरिक त्रस्त झाले आहे. शिर्डी नगरपंचायत वाढीव कर, मालमत्ता कराच्या नावाखाली मोठ्या प्रमाणावर पैसा गोळा करणे परंतु नागरिकांना सुविधा देण्यामध्ये असक्षम ठरले असून त्यामुळे मी आज हे कुत्रे नगरपंचायतमध्ये आणून सोडले आहे.नगरपंचायतने जर हे कुत्रे पकडण्याची मोहीम हाती घेतली नाही तर शिर्डी शहरातील नागरिकांना जाहीर आवाहन करतो की आपल्या परिसरातील कुत्र्याचे पिल्लू धरून आणल्यास प्रत्येक पिल्लुसाठी दहा रुपये तर मोठे कुत्रे आणल्यास पन्नास रुपये आणी डुकर आणल्यावर शंभर रुपये माझ्याकडून बक्षीस देण्यात येणार असल्याचे सांगत मोकाट कुत्रे आढळून आल्यास नगरपंचायतमध्ये आणून सोडावे असे आवाहन त्यांनी केले.</p>
