<p><strong>संगमनेर |शहर प्रतिनिधी| Sangmner</strong></p><p>राज्याचे मुख्यमंत्री तथा शिवसेनेचे पक्षप्रमुख उद्धव ठाकरे व राज्याचे परिवहन मंत्री तथा शिवसेना प्रवक्ते अनिल परब यांच्याविषयी सोशलमिडीयावर </p>.<p>आक्षेपार्ह मजकूर प्रसिध्द करणार्यांविरुध्द सायबर अॅक्टनुसार गुन्हा दाखल करावा अशी मागणी शिवसेना शहर प्रमुख अमर कतारी यांनी केल्यानंतर शहर पोलीस ठाण्यात संबंधीतांविरुद्ध बदनामी केल्याप्रकरणी अदखलपात्र गुन्हा दाखल करण्यात आला आहे.</p><p>शहर पोलीस ठाण्यात दिलेल्या तक्रारीत कतारी यांनी म्हटले आहे की, भाजपचे पदाधिकारी दीपक भगत व इतर सहाजणांनी राज्याचे परिवहनमंत्री अनिल परब यांच्याविषयी सोशलमिडीयावर आक्षेपार्ह मजकूर प्रसिध्द केला आहे. त्यांचे बनावट छायाचित्रे बनवून नियमांचे उल्लंघन करणे, तसेच त्याद्वारे बदनामीकारक संदेश दिल्या कारणाने सायबर डीफेमेशन नियमांचे उल्लंघन झालेले आहे.</p><p>हे सर्व प्रकार विकृत मानसिकतेच्या समाज कंठकांनी दोन राजकीय पक्षाच्या गटात तेढ निर्माण होवून शहरात तणाव निर्माण व्हावा या उद्देशाने केल्याचे त्यावरील इतरही काहींच्या कमेंट वाचून कळते. हा सर्व प्रकार दीपक भगत (रा. नवघरगल्ली, संगमनेर) तसेच इतर सहा व्यक्तींनी केला आहे. </p><p>मात्र यात सहभागी असलेले काहीजण हे विद्यार्थी असल्या कारणाने त्यांच्यावर कोणतेही कायदेशीर कारवाई होवून त्यांचे शैक्षणिक नुकसान व्हावे अशी आमची इच्छा नसून शिवसेना पक्षाचे तसे संस्कार देखील नाही. त्यामुळे त्यांना केवळ कडक शब्दात समज देण्यात यावी. इतर विकृत प्रवृत्तीच्या व्यक्तींवर तात्काळ सायबर अॅक्टनुसार गुन्हा दाखल करुन पुढील कारवाई करावी अशी मागणी विजय डमाळे, लखन घोरपडे, अमित चव्हाण, सोमनाथ गायकवाड, इम्तीयाज शेख, अमोल डुकरे, वेणू गोपाल, लाहोटी, पप्पु कानकाटे आदींनी केली.</p><p>याप्रकरणी शहर पोलीस ठाण्यात भारतीय दंड संहिता 1860 कलम 500 नुसार अदखलपात्र गुन्हा दाखल करण्यात आला आहे. अधिक तपास पोलीस निरीक्षक मुकुंद देशमुख यांच्या मार्गदर्शनाखाली सुरु आहे.</p>
