राहाता |तालुका प्रतिनिधी| Rahata
विदेशातील कोवीड-19 संसर्गाच्या वाढत्या प्रकरणांमुळे राहाता तालुका प्रशासन अलर्ट झाले आहे. नागरिकांनी कोवीड प्रतिबंधात्मक नियमांचे काटेकोर पालन करावे, असे आवाहन राहाता तहसीलदार कुंदन हिरे यांनी केले आहे.
आगामी सण-उत्सवाच्या पार्श्वभूमीवर तालुक्यामध्ये कोविड-19 या प्रादूर्भाव होऊ नये. याकरिता सार्वजनिक ठिकाणी वावरताना मास्क लावावा, गर्दीच्या ठिकाणी जाणे टाळावे, सामाजिक अंतराचे पालन करावे, सार्वजनिक ठिकाणी व्यक्तींनी एकमेकांमध्ये कमीत कमी 6 फूट अंतर ठेवावे, हात नियमितपणे साबण व पाण्याने धुवावेत अथवा सॅनिटायजरचा वापर करावा, आंतरराष्ट्रीय प्रवास टाळावा.
ताप, खोकला, सर्दी, श्वास घेण्यास त्रास, जुलाब इ. लक्षणे आढळून आल्यास तात्काळ जवळच्या आरोग्य केंद्रास भेट देऊन डॉक्टरांचा सल्ला घ्यावा, कोविड-19 प्रतिबंधात्मक लसीकरण तात्काळ करून घ्यावे, सार्वजनिक ठिकाणी थुंकू नये आदी कोविड अनुरूप वर्तनाचे पालन करावे.
शासनाकडून व आरोग्य विभागाकडून देण्यात येणार्या सूचनांचे पालन करावे. प्रतिबंध हा उपचारापेक्षा अधिक चांगला आहे. नागरिकांनी घाबरून न जाता कोवीड अनुरूप वर्तन व सूचनांचे पालन करावे, असे आवाहनही राहाता गटविकास अधिकारी जे.बी.पठारे, तालुका आरोग्य अधिकारी डॉ.संजय घोलप यांनीही केले आहे.