<p><strong>कोपरगाव |प्रतिनिधी| Kopargav</strong></p><p>आरोग्य विभागाकडून करोनाची दुसरी लाट येण्याची शक्यता वर्तविण्यात आली आहे. मागील काही दिवसांत </p>.<p>कोपरगाव तालुक्यात करोना बाधित रुग्णांची संख्या कमी झाल्यामुळे नागरिकांनी देखील केलेला थोडासा निष्काळजीपणा येणार्या संभाव्य लाटेला पूरक ठरू शकतो. त्यामुळे करोना बाधित रुग्णांच्या संख्येत वाढ होण्याची शक्यता नाकारता येत नाही. त्यासाठी सर्व नागरिकांनी करोनाच्या संभाव्य दुसर्या लाटेचा धोका लक्षात घेवून आपल्या व आपल्या कुटुंबाच्या निरोगी आरोग्यासाठी शासनाने दिलेल्या सर्व नियमांचे तंतोतंत पालन करावे असे आवाहन आमदार आशुतोष काळे यांनी केले आहे.</p><p>कोपरगाव तहसील कार्यालयात आ.आशुतोष काळे यांच्या अध्यक्षतेखाली आरोग्यविभाग व शासकीय अधिकार्यांच्या उपस्थितीत करोनाच्या दुसर्या लाटेसंदर्भात करावयाच्या उपाययोजना व घ्यावयाची काळजी याबाबत आढावा बैठक पार पडली. यावेळी आ.काळे म्हणाले, सप्टेंबर महिन्यात करोना रुग्णांच वाढलेलं प्रमाण ऑक्टोबर महिन्यांत कमी होऊन बाधित रुग्णांच्या आकडेवारीवरून परिस्थिती नियंत्रणात असल्याचे चित्र होते. </p><p>त्यामुळे नागरिकांमध्ये करोनाच्या बाबतीत भीती काहीशी कमी झाल्यामुळे अनेक नागरिक मास्क वापरत नव्हते. तसेच नुकत्याच पार पडलेल्या दसरा, दिवाळीच्या सणानिमित्ताने अनेक नागरिक मोठ्या संख्येने घराबाहेर पडले होते. त्यामुळे मोठ्या प्रमाणात झालेली गर्दी व हिवाळ्याच्या पार्श्वभूमीवर आरोग्य विभागाने करोनाची दुसरी लाट येण्याचा इशारा दिलेला आहे. देशात काही ठिकाणी दुसरी लाट आली सुद्धा असून करोनाचा उद्रेक वाढत आहे. </p><p>त्यामुळे नागरिकांनी सतर्क राहणे गरजेचे आहे. कोपरगाव तालुक्यात शंभर बेडचे कोव्हिड केअर सेंटर व 16 ऑक्सिजन बेड, 2 व्हेंटीलेटर मशीन व 2 बायपॅप मशीन, मॉनिटर, 20 के.व्ही.जनरेटर सुविधासह युक्त असलेले डेडीकेटेड कोव्हिड हेल्थ सेंटर गंभीर कोविड रुग्णालयासाठी आपल्याकडे उपलब्ध असल्यामुळे आपल्याकडे यंत्रणा सज्ज आहे. मात्र कोव्हिड अजून संपलेला नाही हे सर्व नागरिकांनी लक्षात घ्यावे. </p><p>लवकरच लग्नसराई सुरू होत आहे त्यामुळे गर्दी होऊन करोना संसर्ग होण्याची शक्यता नाकारता येत नाही. त्यासाठी असे समारंभ टाळावेत. लस येणार आहे. लस कधी येणार व येणारी लस किती प्रभावीपणे काम करू शकेल याचे उत्तर आज देणे शक्य नाही. त्यामुळे अजून काही दिवस तरी नागरिकांनी संयम हा पाळलाच पाहिजे व शासनांच्या नियमांचे पालन केले पाहिजे तरच आपण दुसर्या लाटेचा यशस्वीपणे मुकाबला करू शकतो. </p><p>यावेळी आरोग्यविभाग व शासकीय विभागाकडून करावयाच्या उपाययोजनांचा आमदार आशुतोष काळे यांनी आढावा घेऊन करोनाचा संसर्ग वाढू नये याबाबत मार्गदर्शन केले. बैठकीसाठी तहसीलदार योगेश चंद्रे, सभापती पौर्णिमा जगधने, उपसभापती अर्जुन काळे, काळे कारखान्याचे उपाध्यक्ष सुधाकर रोहोम, तालुका आरोग्य अधिकारी डॉ. संतोष विधाते, डॉ. कृष्णा फुलसुंदर, डॉ. वैशाली बडदे, गटविकास अधिकारी सचिन सूर्यवंशी, दिलीप सोनकुसळे, मुख्याधिकारी प्रशांत सरोदे, पोलीस उपअधीक्षक श्री नागरे, श्री, इंगळे, पद्माकांत कुदळे, अरुण चंद्रे, कारभारी आगवन, पंचायत समिती सदस्य मधुकर टेके, श्रावण आसने, राष्ट्रवादी काँग्रेस पक्षाचे जिल्हा कार्याध्यक्ष संदीप वर्पे, शहराध्यक्ष सुनील गांगुले, युवक तालुकाध्यक्ष चारुदत्त सिनगर, माजी नगराध्यक्ष मंगेश पाटील, नगरसेवक मंदार पहाडे, हाजी मेहमूद सय्यद, सचिन आव्हाड, रोहिदास होन, प्रशांत वाबळे, आदी उपस्थित होते.</p>
