सहकारी दूध संघामुळे तालुक्यात आर्थिक समृद्धी - आ. थोरात

लम्पी आजार रोखण्यासाठी मोफत लस पुरवठा करणार
सहकारी दूध संघामुळे तालुक्यात आर्थिक समृद्धी - आ. थोरात

संगमनेर |प्रतिनिधी| Sangamner

1977 मध्ये तालुक्यात दूध व्यवसायाला सुरुवात झाली. त्यावेळी मोठी जनजागृती करण्यात आली. अनेक दिवसांच्या कष्टातून तालुक्यात दूध व्यवसाय उभा राहिला आहे. या दूध व्यवसायाने व सहकारी दूध संघामुळे तालुक्यात आर्थिक समृद्धी निर्माण झाली असून उत्पादकांनी खाजगीच्या तात्पुरत्या आमिषाला बळी न पडता सहकारी संघाच्या पाठीशी भक्कमपणे उभे राहावे, असे आवाहन काँग्रेस विधिमंडळ पक्षनेते माजी मंत्री आमदार बाळासाहेब थोरात यांनी केले आहे.

संगमनेर तालुका सहकारी दूध उत्पादक संघाच्या 45 व्या वार्षिक सर्वसाधारण सभेत ते बोलत होते. यावेळी अध्यक्षस्थानी दूध संघाचे चेअरमन रणजितसिंह देशमुख हे होते. तर व्यासपीठावर आमदार डॉ. सुधीर तांबे, ज्येष्ठ नेते बाजीराव पा. खेमनर, माधवराव कानवडे, सौ. दुर्गाताई तांबे, इंद्रजीत थोरात, बाबासाहेब ओहोळ, कॅन्सरतज्ञ डॉ. जयश्रीताई थोरात, शंकर खेमनर, गणपतराव सांगळे, संपतराव डोंगरे, रामहरी कातोरे, नवनाथ अरगडे, राजेंद्र चकोर, लक्ष्मणराव कुटे, आर. बी. रहाणे, कार्यकारी संचालक डॉ. सुजित खिलारी, अर्चनाताई बालोडे, मीराताई शेटे, जिल्हा बँकेचे एमडी रावसाहेब वर्पे, पशुसंवर्धन उपायुक्त डॉ. तुंबारे आदी उपस्थित होते.

आमदार थोरात म्हणाले, मागील दोन वर्ष करोना संकटामध्ये शेतकर्‍यांना मोठी मदत या दूध संघाने केली आहे. अशा संकटात संगमनेर तालुका दूध संघ सर्वात पुढे मदतीसाठी होता. यावेळेस खाजगीवाले कुठे दिसत नव्हते. करोनात त्यांनी कुठेही मदत केली नाही. आज लंम्पी आजार वाढलेला आहे. अशा काळात किंवा पशुधन वाचवण्यासाठी 75 डॉक्टरांची टीम काम करत आहे. विविध योजना राबवल्या जात आहेत. सहकारी संस्था टिकल्या पाहिजे, वाढल्या पाहिजे. याकरता खाजगी सेंटरकडे दूध न टाकता दूध उत्पादकांना मदतीची भूमिका ठेवणार्‍या सहकारी संघाच्या पाठीशी भक्कम उभे राहावे असे आवाहन त्यांनी केले.

आमदार डॉ तांबे म्हणाले, सध्या देशात भांडवलदारांचे रक्षण करणारे सरकार आहे. सर्वसामान्यांच्या विकासासाठी सहकाराची व्यवस्था असून प्रत्येक कार्यकर्त्याने सहकारावर निष्ठा ठेवली पाहिजे. स्वच्छ व पारदर्शक कारभारामुळे संगमनेरच्या सहकार देशात लौकिकास्पद ठरला आहे.

रणजीतसिंह देशमुख म्हणाले, करोना काळामध्ये सर्व उद्योग व्यवसायांना मोठा फटका बसला याला आपला दूध संघ ही अपवाद नाही. त्या काळात दूध संघाने तयार केलेली पावडर स्टॉक होती. या आर्थिक वर्षात त्याची विक्री केली. मात्र उत्पादन खर्च आणि विक्री दरातील तफावत यामुळे त्याचा बोजा या वर्षात पडणार आहे. डिझेल दरवाढीमुळे वाहतूक खर्च वाढतो आहे. करोना संकटाच्या काळात आपण महानंदासाठी सरकारकडून 70 कोटी रुपये मंजूर करून घेतले.

दररोज दहा लाख लिटरची पावडर बनवण्यास मंजुरी घेतली. यातून राज्यभरातील दूध उत्पादकांना मोठा दिलासा मिळाला. तालुक्यातही सातत्याने पशुधन, त्यांचे आरोग्य याकरता विविध उपक्रम आपण राबवत आहोत. स्टेट बँकेच्या वतीने सुरू करण्यात आलेल्या योजनेतून 500 शेतकर्‍यांना सुमारे आठ कोटींचे कर्ज वितरण केले आहे. सातत्याने शेतकर्‍यांच्या काळजी करणार्‍या दूध संघाच्या पाठीशी आपण उभे राहावे असे आवाहन त्यांनी केले आहे.

यावेळी साहेबराव गडाख, मोहनराव करंजकर, अविनाश सोनवणे, हौशीराम सोनवणे, संचालक विलासराव वर्पे, भास्करराव सिनारे, संतोष मांडेकर, विलास कवडे, बबन कुराडे, बादशाह वाळुंज, संजय पोकळे, विक्रम थोरात, विष्णू ढोले, तुकाराम दातीर, रवींद्र रोहम, प्रतिभाताई जोंधळे, मंदाताई नवले, फायनान्स मॅनेजर गणपतराव शिंदे, भारत मुंगसे, सुभाष सांगळे, सोमेश्वर दिवटे आदी उपस्थित होते. प्रास्ताविक लक्ष्मणराव कुटे यांनी केले. नोटीस वाचन कार्यकारी संचालक डॉ. सुजित खिलारी यांनी केले. सूत्रसंचालन नामदेव कहांडळ व सुरेश जोंधळे यांनी केले तर व्हा. चेअरमन राजेंद्र चकोर यांनी आभार मानले.

लम्पी आजारासाठी मोफत लस पुरवठा

राजहंस दूध संघाच्या वतीने लंम्पी या आजाराबाबत तातडीने पशुवैद्यकीय अधिकार्‍यांच्या बैठका घेतल्या असून तालुक्यात गायींचे लसीकरण केले आहे. तर आगामी काळात पशुधन वाचवण्यासाठी तालुक्यातील सर्व पशुधनासाठी मोफत लसपुरवठा करण्यात येईल असे रणजीतसिंह देशमुख यांनी सांगितले आहे.

Related Stories

No stories found.
Latest Marathi News, Marathi News Paper, Breaking News In Marathi, Marathi Batmya Live
www.deshdoot.com