<p><strong>अहमदनगर |प्रतिनिधी| Ahmednagar</strong></p><p>शैक्षणिक संस्था आणि त्यांचे परिसर तंबाखूमुक्त व्हावेत, यासाठी तंबाखूमुक्त शाळा अभियानाची सर्व संबंधित </p>.<p>यंत्रणांनी काटेकोरपणे अंमलबजावणी करावी, आवश्यक तेथे आर्थिक दंड आकारावा असे निर्देश जिल्हाधिकारी डॉ.राजेंद्र भोसले यांनी दिले.</p><p>राष्ट्रीय तंबाखू नियंत्रण कार्यक्रमांतर्गत जिल्हास्तरीय तंबाखू नियंत्रण समितीची बैठक गुरूवारी जिल्हाधिकारी कार्यालयात आयोजित करण्यात आली होती. या बैठकीत तंबाखूमुक्तीसाठीच्या विविध उपाययोजनांचा आढावा घेताना जिल्हाधिकारी डॉ. भोसले बोलत होते.</p><p>बैठकीला जि.प.चे मुख्य कार्यकारी अधिकारी राजेंद्र क्षीरसागर, निवासी उपजिलहाधिकारी संदीप निचित, जिल्हा आरोग्य अधिकारी डॉ.संदीप सांगळे, जिल्हा शल्यचिकित्सक डॉ.सुनील पोखरणा, महानगरपालिका आरोग्य अधिकारी डॉ.अनिल बोरगे उपस्थित होते. बैठकीत, जिल्हाधिकार्यांनी सिगारेट व अन्य तंबाखूजन्य उत्पादने प्रतिबंध व व्यापार कायद्यातील तरतुदींचे काटेकोरपणे पालन होईल याकडे संबंधित यंत्रणांनी लक्ष द्यावे आणि या कायद्यातील तरतुदींची अंमलबजावणी करावी असे सांगितले. </p><p>सार्वजनिक ठिकाणे, शाळा, महाविद्यालये, शासकीय आस्थापना परिसर तंबाखूमुक्त करण्यासाठी कठोर कारवाई करण्याची तसेच हुक्का व तत्सम पदार्थ विक्रीविरोधात कडक कारवाई करण्याची सूचना केली. जिल्हा परिषदेचे मुख्य कार्यकारी अधिकारी राजेंद्र क्षीरसागर यांनी, विविध यंत्रणांनी सादर केलेल्या अहवालाची माहिती दिली. </p><p>यावेळी जिल्हा एडस् नियंत्रण समिती, जिल्हा रुग्णालयाची रुग्ण कल्याण समिती, जिल्हा टी.बी.फोरम समिती, महात्मा फुले जनआरोग्य योजना समिती, राष्ट्रीय क्षयरोग दुरीकरण कार्यक्रम समितीची बैठक पार पडली. </p><p>या कार्यक्रमासाठी जिल्ह्यास देण्यात आलेले उद्दिष्ट, यंत्रणांनी पूर्ण केलेले उद्दिष्ट, योजनांच्या अंमलबजावणीसाठी येणार्या अडचणी याबाबत आढावा घेण्यात आला. बैठकीला महानगरपालिका, जिल्हा परिषद तसेच आरोग्य विभागाचे संबंधित अधिकारी व कर्मचारी उपस्थित होते.</p>
