घरफोडीत सोन्या-चांदीच्या दागिन्यासह 4 लाखाचा ऐवज लंपास

घरफोडीत सोन्या-चांदीच्या दागिन्यासह 4 लाखाचा ऐवज लंपास

श्रीरामपूर |प्रतिनिधी| Shrirampur

तालुक्यातील भामाठाण येथे अज्ञात चोरट्यांनी घरफोडी करून रोख रकमेसह 3 लाख 99 हजार रुपये किंमतीचा ऐवज लांबविला. त्यात सुमारे साडेबारा तोळे सोन्याचे दागिने, पाच भाराचे चांदीचे दागिने व 1 लाख 81 हजार रोख रक्कम असा ऐवज आहे. काल दि. 21 मे 2023 रोजी रात्री 10:30 ते 22 मे रोजी पहाटे 4 वाजेच्या दरम्यान ही घटना घडली.

भामाठाण येथील रमेश जगन्नाथ कुलकर्णी यांनी याप्रकरणी श्रीरामपूर तालुका पोलिस ठाण्यात फिर्याद दिली असून फिर्यादित म्हटले आहे की, दि. 21 मे रोजी रात्री 10:30 ते 22 मे रोजी पहाटे 4 वाजेच्या दरम्यान अज्ञात चोरट्यांनी घराच्या बेडरूममधील मागील दरवाज्याचा आतील बाजूचा कडीकोंडा उचकटून घरात प्रवेश केला. घरातील लोखंडी कपाटातील सोन्या चांदीचे दागिने व रोख रक्कम चोरून नेली.

घरफोडीत 70 हजार रु. किंमतीचे 4 तोळ्याचे सोन्याचे गंठण 55 हजार रुपये किंमतीची 3 तोळ्याची मोहनमाळ, 30 हजार रुपये किंमतीचे दीड तोळ्याचे सोन्याचे छोटे गंठण, 10 हजार रुपये किंमतीची अर्ध्या तोळ्याची सोन्याची अंगठी, 20 हजार रुपये किंमतीची 1 तोळ्याची सोन्याची साखळी, 16 हजार रुपये किंमतीचे 8 ग्रॅम वजनाचे कानातील झुबे, 8 हजार रुपये किंमतीचे 4 ग्रॅम वजनाची ब्रायलेट रिंग, 1 हजार रुपयाची सोन्याची नथ, 6 हजार रुपये किंमतीच्या 3 अंगठ्या, 2 हजार रुपये किंमतीचे चांदीचे दागिने व 1 लाख 81 हजार रुपये रोख रक्कम असा एकूण 3 लाख 99 हजार किंमतीचा ऐवज चोरट्यांनी चोरून नेला आहे.

या घटनेची माहिती मिळताच तालुका पोलिस ठाण्याचे निरिक्षक श्री. चौधरी यांनी घटनास्थळी भेट दिली. नगर येथून श्वान पथकास व ठसे तज्ञ यांना पाचारण करण्यात आले होते. पोलिसांनी घटनेचा पंचनामा करून फिर्यादिवरून अज्ञात चोरट्यांविरुद्ध भादंवि कलम 457, 380 नुसार गुन्हा दाखल केला आहे. अधिक तपास श्रीरामपूर तालुका पोलिस करीत आहेत.

logo
Latest Marathi News, Marathi News Paper, Breaking News In Marathi, Marathi Batmya Live
www.deshdoot.com