आश्वी खुर्द परिसरात बिबट्याचा वावर

आश्वी |वार्ताहर| Ashwi

संगमनेर तालुक्यातील आश्वी खुर्द शिवारात रविवारी मध्यरात्री उद्योजक राजेंद्र मांढरे यांनी घराकडे जात असताना एक बिबट्या मुक्तपणे वावरताना आपल्या मोबाईल कॅमेरात कैद केला आहे. तरी परिसरातील नागरिकांनी सावध राहावे, असे आवाहन करण्यात आले आहे.

याबाबत मिळालेली माहिती अशी की, उद्योजक राजेंद्र मांढरे हे रविवारी रात्री 12 वाजेच्या सुमारास मांढरे वस्तीवरील आपल्या घराकडे चालले होते. यावेळी मांढरे वस्तीवर असलेल्या जिल्हा परिषद शाळेलगत त्यांना काही हालचाल जाणवल्याने त्यांनी गाडीचा उजेड हालचालीच्या दिशेने वळवला असता त्यांना शिकारीच्या शोधात असलेला एक बिबट्या नजरेस पडला. त्यामुळे त्यांनी तो बिबट्या आपल्या मोबाईल कॅमेरात कैद करत परिसरातील नागरिकांना सावधानता बाळगण्याचे आवाहन केले आहे.

दरम्यान जिल्हा परिषद शाळेलगत बिबट्या वावरतांना दिसत असल्याने परिसरातील नागररिकांमध्ये दहशतीचे वातावरण असून या जिल्हा परिषद शाळेत लहान मुले शिक्षण घेत असल्याने पालक वर्गात मोठी भिती निर्माण झाली आहे. त्यामुळे पालकांनी मुलांना शाळेत एकटे न पाठवता स्वतः शाळेत सोडवण्यास येणे गरजेचे असून शिक्षकांनी व परिसरातील नागरिकांनी सावध राहणे गरजेचे आहे.

या परिसरात शाळा असल्यामुळे लहान मुलाबरोबरचं मोठी वर्दळ व लोकवस्ती आहे. त्यामुळे वनविभागाने या परिसरात पिंजरा लावून हा बिबट्या जेरबंद करावा, अशी मागणी स्थानिक नागरिकांनी केली आहे.