<p><strong>आश्वी |वार्ताहर| Ashwi</strong></p><p>शिर्डी मतदार संघ व संगमनेर तालुक्यातील 14 ग्रामपंचायतींचे धक्कादायक निकाल समोर आले असून विखे पाटील गटाकडे असलेल्या </p>.<p>चिंचपूर, शेडगाव, झरेकाठी व पानोडी या ग्रामपंचायती थोरात गटाकडे गेल्याने आ. विखे गटाला हा मोठा धक्का मानला जात आहे. तर ना. थोराताच्या ताब्यातील कनोली व मनोली ग्रामपंचायती विखे गटाने खेचून आणल्या आहेत. तसेच खळी ग्रामपंचायत निवडणुकीत ना. थोरात व आ. विखे पाटील सहमती एकस्प्रेसने बाजी मारल्याने चारही उमेदवार निवडून आले आहेत.</p><p>आश्वी पंचक्रोशीतील कनोली ग्रामपंचायतीत आ. विखे पाटील गटाचे 7 सदस्य निवडून आल्याने विखे गटाने सत्ता मिळवून सत्तातंर केले आहे. तर येथे ना. थोरात गटाचे 4 सदस्य निवडून आले आहेत.</p><p>ओझर बुद्रुक ग्रामपंचायतीत ना. थोरात गटाचे 8 सदस्य निवडून आल्याने थोरात गटाने सत्ता राखली आहे. येथे आ. विखे पाटील गटाला अवघ्या एका जागेवर समाधान मानावे लागले आहे.</p><p>चणेगाव ग्रामपंचायतीत ना. थोरात गटाने मुसंडी मारल्याने त्याचे 7 सदस्य विजयी झाल्याने सत्ता मिळवली आहे. तर आ. विखे पाटील गटाचा अवघा 1 सदस्य निवडून आला आहे. याठिकाणी एक अपक्ष उमेदवार विजयी झाला आहे.</p><p>दाढ खुर्द ग्रामपंचायतीत आ. विखे पाटील गटाचे 7 सदस्य निवडून आल्याने सत्ता राखली असून ना. थोरात गटाचे अवघे 2 सदस्य विजयी झाले आहेत.</p><p>प्रतापपूर ग्रामपंचायतीसाठी आ. विखे यांना मानणार्या तीन गटांतच सत्ता वर्चस्वाची रस्सीखेच असताना भगवानराव इलग यांचे 6 सदस्य विजयी झाले तर लक्ष्मण आंधळे, विलास आंधळे यांचे 3 सदस्य विजयी झाले आहेत.</p><p>पिंप्रीलौकी आजमपूर ग्रामपंचायतीत आ. विखे गटाचे 10 सदस्य विजयी झाल्याने विखे गटाने सत्ता राखली आहे. येथे थोरात गटाचा अवघा एक सदस्य विजयी झाला आहे.</p><p>चिंचपूर येथे विखे गटाला मोठा धक्का बसला असून येथे थोरात गटाचे 8 सदस्य निवडून आल्याने येथे थोरात गटाची सत्ता आली असून विखे गटाचे 5 सदस्य निवडून आल्याने सत्ता गमावली आहे.</p><p>मनोली ग्रामपंचायतीत थोरात गटाला धक्का देत विखे गटाने 9 सदस्य निवडून आणत बहुमत मिळवले आहे. येथे थोरात गटाचे फक्त 2 सदस्य निवडून आले आहेत.</p><p>औरंगपूर ग्रामपंचायतीत विखे गटाने 5 सदस्य निवडून आणत सत्ता राखली आहे. येथे थोरात गटाचे 2 सदस्य विजयी झाले आहेत.</p><p>झरेकाठी ग्रामपंचायतीत थोरात गटाने 6 जागांवर विजय मिळवत सत्ता खेचून आणली असून विखे गटाचे अवघे 2 सदस्य निवडून आले आहेत.</p><p>शेडगाव ग्रामपंचायतीत थोरात गटाचे 6 उमेदवार विजयी झाल्याने बहुमत मिळवले आहे. येथे विखे गटाचे 2 सदस्य विजयी झाले आहेत.</p><p>शिबलापूर ग्रामपंचायत विखे गटाने आपल्याकडे राखत 7 सदस्य निवडून आणले आहेत. येथे थोरात गटाचे 4 सदस्य विजयी झाले आहेत.</p><p>पानोडी ग्रामपंचायतीत सत्तांतर झाले असून थोरात गटाचे 8 सदस्य निवडून आले असून विखे गटाला विजयी 3 सदस्यांवर समाधान मानावे लागले आहे.</p>
