अपघातात अंगावरून ट्रॅक्टर गेल्याने महिलेचा मृत्यू

करजगाव |वार्ताहर| Karajgav

ट्रॅक्टरला (Tractor) ओव्हरटेक करत असताना दोन मोटारसायकलींची धडक (Two Bike Accident) होवून एका मोटारसायकलवरील महिला ट्रॅक्टरच्या चाकाखाली येवून तीचा मृत्यू (Death) झाल्याची घटना शुक्रवारी रात्री नेवासा (Newasa) तालुक्यातील अंमळनेर-निंभारी रस्त्यावर घडली.

नेवासा तालुक्यातील अंमळनेर-निंभारी रस्त्यावर घावटे वस्तीजवळ शुक्रवारी रात्री निंभारी येथील सुनिता संजय गवळी यांच्या अंगावरून ट्रॅक्टर गेल्याने त्यांचा जागीच मृत्यू झाला. निंभारी येथील धनंजय संजय गवळी हा त्याची आई सुनिता व ज्ञानेश्वरी जयप्रकाश गवळी यांना घेवून चुलतबहिणीच्या हळदीच्या कार्यक्रमासाठी अंमळनेर येथे जात होता.

दरम्यान ऊस घेऊन जाणार्‍या ट्रॅक्टरला ओव्हरटेक करत असताना दोन मोटारसायकलची समोरासमोर धडक झाली. त्यात गवळी याची मोटरसायकल ट्रॅक्टरच्या बाजूने पडली. यात सुनिता गवळी यांच्या अंगावरुन चाक गेल्याने त्यांचा जागीच मृत्यू झाला. तर दुसर्‍या मोटारसायकलवरील दुचाकीस्वार गंभीर जखमी झाले असून हॉस्पीटलमध्ये उपचार घेत आहे.

हे जखमी दुचाकीस्वार गोणेगाव येथील असल्याची माहिती कळते. मयत सुनिता गवळी यांच्यावर शवविच्छेदनानंतर शनिवारी दुपारी निंभारी येथे अंत्यसंस्कार करण्यात आले. दरम्यान या अपघात मृत्यूबाबत सोनई पोलीस ठाण्यात नोंद करण्यात आली.

अपघाताने हिरावले पुतणीचे लग्न, घरभरणी व मुलाच्या लग्नाचा आनंद

शनिवारी पुतणीचा विवाह तर रविवारी घरभरणी निमीत्त सत्यनारायण पुजा होणार होती. तसेच मुलाचे लग्न जमले होते.पुढील महिन्यात वरमाई होण्याचे स्वप्न मात्र अपुरे राहिले. या अपघाताने गवळी कुटुंबाला दुःखाच्या खाईत लोटले.