<p>देवगड फाटा l वार्ताहर</p><p>श्रीक्षेत्र देवगड संस्थान प्रशासनाने दत्त जन्म सोहळा अत्यंत अल्पसंख्येत साजरा करण्याचे ठरविले आहे. त्या दृष्टीने</p>.<p>मंगळवार दि.29 डिसेंबर रोजी सकाळ पासून ते बुधवार दि.30 डिसेंबर रोजी सायंकाळ पर्यंत प्रवरासंगम, देवगड फाटा व नेवासा येथून श्री क्षेत्र देवगड कडे येणारे रस्ते बंद केले आहे.</p>.<p>देवगड देवस्थानचे मुख्य प्रवेश द्वार देवगड फाटा येथे आहे. त्या अनुषंगाने देवगड फाटा येथे मोठा फौजफाटा आहे. 7 पोलीस, 2 होमगार्ड व महिला पोलीस तैनात करण्यात आले आहे. त्यामुळे भाविक भक्त देवगड फाटा येथूनच दर्शन घेऊन माघारी जात आहे.</p>.<p>देवगड फाटा येथे नेवासा पोलीस निरीक्षक त्यागी यांच्या मार्गदर्शनाखाली पोलीस नाईक सुभाष म्हस्के, राजू काळे, सुनील भोईटे, महेश हेलाडे, महिला पोलीस प्पलवी तुपे, मीनल सागळे आदी पोलीस कर्मचारी उत्कृष्ट काम निभावत आहे.</p>.<p>श्रीक्षेत्र देवगड संस्थान प्रशासनाने प्रसिद्धीस दिलेल्या पत्रकात म्हंटले आहे की, या वर्षी करोना महामारीच्या जागतिक संकटामुळे सर्वच क्षेत्रामध्ये कमालीची स्वच्छता व सुरक्षित अंतर पाळण्यात येत असून सर्व प्रकारचे सार्वजनिक कार्यक्रमांवर शासन प्रशासनाकडून अनेक बंधने आलेली आहेत. त्या दृष्टीने, कार्यकारी मंडळ तसेच भक्तगणांशी चर्चा करुन या वर्षी संपन्न होणारा भगवान दत्तात्रेय जन्म सोहळा अत्यंत साधेपणाने साजरा करण्याचा निर्णय संस्थान प्रशासनाने घेतलेला आहे. शेजारील कर्नाटक व इतर ठिकाणी जाहिर झालेले नविन लॉकडाऊन व नुकत्याच पार पडलेल्या श्री क्षेत्र आळंदी व श्री क्षेत्र जेजूरी येथील अनुभव लक्षात घेता, संस्थान प्रशासनाने दत्त जन्म सोहळाप्रसंग अत्यंत अल्पसंख्येत साजरा करण्याचे ठरविले आहे. त्या दृष्टीने मंगळवार दि.29 डिसेंबर 2020 रोजी सकाळपासून ते बुधवार दि.30 डिसेंबर 2020 रोजी सायंकाळ पर्यंत प्रवरासंगम, देवगड फाटा व नेवासा येथून श्री क्षेत्र देवगड कडे येणारे रस्ते बंद केले जाणार असून श्री क्षेत्र देवगड येथील नविन स्वागतद्वारही पूर्णतया बंद राहील, याची सर्व भाविक भक्तांनी नोंद घ्यावी. दत्त जन्म सोहळ्याचा आनंद अनुभवण्यासाठी येणाऱ्या भाविक भक्तांची गैरसोय होऊ नये. यासाठी दत्त जन्म सोहळ्याचे विविध दूरचित्रवाहिन्या तसेच फेसबूकद्वारा थेट प्रक्षेपण करण्यात येणार आहे, तरी सर्व भाविकांनी त्याचा लाभ घेऊन प्रत्यक्ष श्री क्षेत्र देवगड येथे येण्याचे टाळावे व संस्थान प्रशासनास सहकार्य करावे, असे आवाहन संस्थानतर्फे करण्यात येत आहे.</p>
