स्वाईन फ्लू, डेंग्यूने जिल्हा हैराण

अहमदनगर |प्रतिनिधी| Ahmednagar

ढगाळ वातावरण, साठलेले पाणी, वाढलेले गवत यामुळे डासांची उत्पत्ती वाढली असून यामुळे जिल्ह्यात किटकजन्य आणि विषाणूजन्य आजार वाढले आहेत. विशेष म्हणजे जिल्ह्यात कोविड प्रार्दुभाव कमी झाल्यानंतर कोविडप्रमाणे लक्षणे असणार्‍या लागण झाल्यानंतर जिवघेण्या ठरणार्‍या स्वाईन फ्लूने डोकेवर काढले आहे. यामुळे नागरिक हैराण झाले असून खासगी रुग्णालय फूल्ल असल्याचे दिसत आहे. शासकीय आकडेवारीनूसार जिल्ह्यात जानेवारी ते 22 ऑगस्टअखेर डेंग्यूचे 105 तर स्वाईन फ्लूचे 23 रुग्ण सापडले आहेत. मात्र, खासगी रुग्णालयातील चित्र काही वेगळेच आहे.

दरम्यान, आतापर्यंत स्वाईन फ्लूने सात जणांचा मृत्यू झाला असून संगमनेर, कोपरगाव, राहाता, पारनेर व नगर तालुक्यात स्वाईनचे रुग्ण सापडलेले आहेत. जिल्हा परिषद आरोग्य विभागाच्या आकडेवारीनूसार डेंग्यूची 34 आणि खासगी प्रयोग शाळेत केलेल्या तपासणीत एनएस 1 (संशयीत डेंग्यू) 71 रुग्ण समोर आले आहेत. तर स्वाईनची चाचणी महागडी असल्याने लक्षणानूसार उपचार करण्यात येत असून गंभीर होणार्‍या रुग्णांची स्वाईनची तपासणी करण्यात येत आहे. वैद्यकीय क्षेत्रातील तज्ज्ञांच्या म्हणण्यानूसार निमोणीच्या 100 रुग्णांपैकी तपासणी केल्यास 40 ते 50 रुग्ण हे स्वाईन फ्लूचे सापडू शकतात. तर 30 ते 40 टक्के हे बॅक्टेरीयल निमोणीचे रुग्ण सापडू शकतात. डेंग्यू आजारात विशिष्ट उपचार पध्दती नसली तर लक्षणानूसार उपचार करण्यात येत आहेत.

ताप, तीव्र घसा दुखी आणि खोकला असल्यास स्वाईन फ्लूचा धोका अधिक असल्याने रुग्णांनी वेळ न दवडता तातडीने शासकीय अथवा खासगी उपचार करावेत. विद्यमान परिस्थितीत जिल्ह्यात स्वाईन आणि डेंग्यूमुळे रुग्ण व्हेंटीलेटरपर्यंत पोहण्याचे प्रमाण वाढत असल्याचे निरिक्षक काही वैद्यकीय तज्ज्ञांनी नोंदवले आहे. शासकीय आरोग्य सेवत संशयित रुग्णांचे स्वॅब घेऊन पुण्याला तपासणीसाठी पाठविले जात आहेत. जिल्ह्यात डेंग्यू, स्वाईन फ्लू संसर्गाचा प्रसार अधिक होऊ नये, झाला तर तो आटोक्यात यावा, यासाठी आरोग्य विभागाचे शर्तीचे प्रयत्न सुरु आहेत. स्वाईन फ्लू रुग्णांचे निदान करण्यासाठी गावागावांतील सर्दी, पडसे व खोकला असणार्‍या व्यक्तींचे सर्व्हेक्षण केले जात आहे. स्वाईनमध्ये संसर्गाचे गांभीर्य पाहून आरोग्य विभागकडून टॅमी फ्लू हे औषध देण्यात येत आहे.

आरोग्य विभागाच्या माहितीनूसार स्वाईनचे संगमनेर तालुक्यामध्ये 15 रुग्ण सापडले असून सर्व रुग्ण हे खाजगी रुग्णालयात उपचार घेतले आहेत. त्यापैकी 2 रुग्णांचा मृत्य झाला आहे. यातील एका रुग्णांचा मृत्यू नाशिकच्या खाजगी रुग्णालयात तर दुसर्‍याचा संगमनेर येथे खाजगी रुग्णालयात झाला आहे. कोपरगाव तालुक्यामध्ये स्वाईनचे 3 रूग्ण होते. हे तिनही रुग्ण उपचारादरम्यान दगावले आहेत. यात दोन मृत्यू नाशिक येथे खाजगी रुग्णालयात, तिसरा मृत्यू नगर सिव्हील येथे झाला आहे. पारनेर तालुक्यामध्ये स्वाईन 3 रुग्ण होते. यातील एकाचा नगर सिव्हील हॉस्पिटल येथे मृत्यू झाला असून दोघांवर सिव्हील हॉस्पीटलमध्ये उपचार सुरू आहे. नगर तालुक्यामध्ये स्वाईनचा एक रुग्ण होता. त्याचा उपचार सुरू असतांना त्यांचा मृत्यू झाला आहे. राहाता तालुक्यामध्ये एक रुग्ण सापडला होता. त्याच्यावर उपचार सुरू आहेत.

डेंग्यू रुग्ण कुठे ?

नगर 3, श्रीगोंदा 5, कर्जत 2, पाथर्डी 2, नेवासा 2, राहुरी 8, श्रीरामपूर 4, राहाता 35, कोपरगाव 10, संगमनेर 22, अकोले 6, पारनेर 5 एकूण 105 डेंग्यू रूग्ण आहेत.