नगर जिल्हा राष्ट्रवादीत बदल ?

अहमदनगर |प्रतिनिधी| Ahmednagar

राष्ट्रवादी पक्षाच्या मुंबई येथे मंगळवारी (दि.4) झालेल्या बैठकीत नगर जिल्हा सहकारी बँकेतील पराभरावर सखोल चर्चा झाली. यात जिल्हा बँकेतील पराभवासह जिल्ह्यात पक्षात गटातटाचे राजकारण करणार्‍या पदाधिकार्‍यांना डच्चू देण्याची तयारी पक्षश्रेष्ठींनी केली आहे. त्यामुळे नगर जिल्हा राष्ट्रवादीत लवकरच संघटनात्मक बदल होणार असल्याची माहिती सुत्रांनी दिली. जिल्हा बँकेतील पराभव पक्षश्रेष्ठींनी गंभीरपणे घेतला अल्याने काही प्रमुख पदाधिकारी यांना खुर्ची रिकामी करण्याची वेळ येणार आहे.

आशिया खंडात नाव असणार्‍या नगर जिल्हा बँकेच्या निवडणुकीपासून ते मागील महिन्यांत झालेल्या अध्यक्षपदाच्या निवडीत संख्याबळ असतानाही राष्ट्रवादीच्या उमेदवाराचा पराभव झाला आणि बँकेचे अध्यक्षपद आयते भाजपच्या ताब्यात गेले. या पराभवावर राष्ट्रवादीचे नेते आ. अजित पवार चांगलेच संतप्त झाले आहेत. नुकत्याच त्यांच्या कर्जत दौर्‍यात जिल्हा बँकेच्या निवडणुकीत गडबड करणार्‍यांचा चांगलीच अद्दल घडवणार असल्याचे त्यांनी जाहीर भाषणात सांगितले होते.

दरम्यान, मंगळवारी राष्ट्रवादीची राज्यस्तरीय बैठक मुंबईत शरद पवार यांच्या उपस्थितीत झाली. या बैठकीत राज्यातील अन्य विषयांसोबत नगर जिल्हा बँकेच्या अध्यक्ष निवडीचा विषय निघाला. यावेळी झालेल्या चर्चेत बँकेच्या निवडणुकीत पक्षाला मान खाली घालायला लावणार्‍यांवर कडक कारवाईच्या सुचना देण्यात आल्या आहेत.

तसेच जिल्ह्यात राष्ट्रवादी एकसंघ ठेवण्याऐवजी गटातटाचे राजकारण करणार्‍या काही प्रमुख पदाधिकारी यांना थेट घराचा रस्ता दाखवण्यात येणार असल्याची माहिती पक्षाच्या सुत्रांनी दिली. मात्र, ही कारवाई कधी होणार याबाबत अधिक माहिती देण्यास सुत्रांनी नकार दिला. यामुळे येत्या काही दिवसांत नगर जिल्हा राष्ट्रवादीत काय काय बदल होणार हे पाहणे महत्वाचे ठरणार आहे.