Crime News : नाशिकचे दोन सोनसाखळी चोरटे गजाआड
अहमदनगर (प्रतिनिधी)
नगर शहरासह संगमनेर, श्रीरामपूर, राहुरी, नाशिक व नवी मुंबई परिसरात महिलेच्या गळ्यातील सोन्याचे दागिने चोरणार्‍या नाशिकच्या दोन सोनसाखळी (चैन स्नॅचिंग) चोरट्यांना नगर स्थानिक गुन्हे शाखेच्या पोलिसांनी अटक केली आहे. लहु बबन ऊर्फ बबलु काळे (रा. संत जनार्धन साखर कारखान्यामागे, पळसे, जि. नाशिक) व विनोद गोविंद पिंपळे (रा. गोसावीवाडी, नाशिक रस्ता, जि. नाशिक) अशी त्यांची नावे आहेत. त्यांनी सुनील पवार (रा. नाशिक) याच्या सोबत गुन्हे केल्याची कबुली दिली असून तो पसार झाला आहे.
दरम्यान, अटक केलेल्या दोघांनी सात ठिकाणी चैन स्नॅचिंग केल्याची कबुली दिली असून त्यांच्याकडून चार लाख 75 हजार रूपये किंमतीचे 95 ग्रॅम वजनाचे सोन्याचे दागिने व एक लाख रूपये किमतीची दुचाकी असा एकुण पाच लाख 75 हजार रूपये किंमतीचा मुद्देमाल हस्तगत करण्यात आला आहे. प्रिया मुंकूद झंवर (वय 35 रा. छायानगर, रेल्वे स्टेशन, नगर) या त्यांच्या मुलासोबत दुचाकीवरून जात असताना त्यांच्या गळ्यातील मंगळसूत्र दुचाकीवरून आलेल्या दोघांनी बळजबरीने चोरून नेले होते. याप्रकरणी कोतवाली पोलीस ठाण्यात गुन्हा दाखल करण्यात आला होता.
सदर गुन्ह्याचा समांतर तपासासह जिल्ह्यात घडलेल्या चैन स्नॅचिंग गुन्ह्याचा तपास करण्याबाबत पोलीस अधीक्षक राकेश ओला यांनी स्थानिक गुन्हे शाखेच्या पोलिसांना आदेश दिले होते. गुन्हे शाखेचे पोलीस निरीक्षक दिनेश आहेर यांच्या मार्गदर्शनाखाली सहा. पोलीस निरीक्षक हेमंत थोरात, उपनिरीक्षक तुषार धाकराव, अंमलदार विजय वेठेकर, दत्तात्रय हिंगडे, अतुल लोटके, देवेंद्र शेलार, रवींद्र कर्डिले, गणेश भिंगारदे, भिमराज खर्से, सागर ससाणे, अमृत आढाव, मेघराज कोल्हे, प्रशांत राठोड, भाग्यश्री भिटे व संभाजी कोतकर यांचे पथक गुन्हे उघडकीस आणण्यासाठी प्रयत्न करत होते. दरम्यान, पोलीस निरीक्षक आहेर यांना माहिती मिळाली की, चैन स्नॅचिंग चोरी करणारे लहु काळे व विनोद पिंपळे हे दोघे नगर- मनमाड रस्त्याने नगरच्या दिशेने दुचाकीवर चोरीचे सोने विक्री करण्यासाठी येणार आहेत. निरीक्षक आहेर यांनी पथकाला सदरची माहिती सांगून कारवाईच्या सूचना दिल्या. पथकाने मनमाड रस्त्यावर कॉटेज कॉर्नर जवळील सिना नदीवरील पुलाच्या जवळ सापळ लावुन दोघांना पकडले.
सात गुन्हे उघडकीस
अटक केलेल्या दोघांकडे कोठे कोठे गुन्हे केले या बाबत विचारणा केली असता त्यांनी नगर, संगमनेर, श्रीरामपूर, राहुरी, नाशिक व नवी मुंबई परिसरात जबरी चोरी व चोरीचे गुन्हे केल्याची कबुली दिली. पोलिसांनी गुन्हे अभिलेख पडताळणी केली असता कोतवाली, श्रीरामपूर शहर, संगमनेर शहर, राहुरी, पनवेल शहर व मुंबई नाका येथील सात गुन्हे उघडकीस आले आहेत.
