<p>अहमदनगर | Ahmedagar</p><p>टूर्स अँड ट्रॅव्हल्स कंपनीकडून वाहने भाडोत्री घेत सदरची वाहने...</p>.<p>परस्पर गहाण ठेवून फसवणूक केल्याप्रकरणी एकाला स्थानिक गुन्हे शाखेच्या पोलिसांनी अटक केली. दादा ऊर्फ शशिकांत मारुती सातपुते (वय 26 रा. भोयरे गांगर्डा ता. पारनेर) असे अटक केलेल्या आरोपीचे नाव आहे. त्याच्याकडून दोन कोटी 69 लाख रुपये किंमतीच्या 16 आलीशान कार पोलिसांनी जप्त केल्या आहेत.</p>.<p>महेश प्रताप खोबरे (वय 40 रा. पिसोळ जि- पुणे) यांचा टुर्स अँड ट्रॅव्हल्सचा व्यवसाय आहे. सातपुते याने खोबरे यांच्याकडून मार्च 2020 ते डिसेंबर 2020 या कालावधीमध्ये 22 कार महाबली एन्टरप्रायजेस या नावाने भाड्याने चालविण्यासाठी घेतल्या होत्या. त्यापैकी 9 कार सातपुते याने खोबरे यांना परत केल्या. मात्र, उर्वरित 13 कारचे भाडे व त्या कार खोबरे यांना परत केल्या नाहीत. तसेच कारबाबत काहीही माहिती खोबरे यांना दिली नाही. त्यामुळे त्यांनी सुपा पोलीस ठाण्यात दिलेल्या फिर्यादीवरून आरोपी शशिकांत सातपुते याच्याविरुध्द गुन्हा दाखल करण्यात आला होता.</p>.<p>गुन्ह्याचे गांभिर्य लक्षात घेत पोलीस अधीक्षक मनोज पाटील यांनी गुन्ह्याचा तपास स्थानिक गुन्हे शाखेकडे हस्तांतरीत करत तपासाबाबत सूचना दिल्या. त्याप्रमाणे स्थानिक गुन्हे शाखेचे पोलीस निरीक्षक अनिल कटके यांच्या मार्गदर्शनाखाली पथकाने गुन्ह्याचा तपास सुरु केला. तपासामध्ये आरोपी दादा उर्फ शशिकांत मारुती सातपुते याचा शोध घेत त्याला अटक करुन त्याची पारनेर न्यायालयाकडून वेळोवेळी पोलीस कोठडी घेण्यात आली.</p>.<p>पोलीस कोठडी दरम्यान आरोपीकडून एकूण 16 अलीशान कार जप्त करण्यात आल्या आहेत.</p>
