<p>नाशिक | Nashik</p><p>केंद्रीय लोकसेवा आयोगाने सन २०२१ मध्ये होणाऱ्या नॅशनल डिफेन्स अकॅडमी ॲण्ड नेव्हल अकॅडमी परीक्षेचे वेळापत्रक जाहीर केले आहे. त्यानुसार राज्यात मुंबई व नागपूर केंद्रावर येत्या १८ एप्रिलला परीक्षा पार पडणार आहे. </p> .<p>तर, इच्छुक व पात्र विद्यार्थ्यांना ऑनलाइन अर्ज करण्यासाठी येत्या १९ जानेवारीपर्यंत मुदत देण्यात आली आहे. विद्यार्थ्यांना अर्ज मागे घेण्यासाठी २७ जानेवारी ते २ फेब्रुवारीपर्यंतची संधी मिळणार आहे.</p><p>पुणे येथील राष्ट्रीय संरक्षण प्रबोधिनी अर्थात 'एनडीए'मध्ये इयत्ता बारावीनंतर बी. टेक. या अभियांत्रिकी अभ्यासक्रमासह सैन्य दल अधिकारी, तर केरळ येथील नेव्हल अकॅडमीमध्येही पदवी शिक्षणासोबत नौदलातील अधिकारी होण्याची संधी असते. </p><p>यंदा 'एनडीए'मध्ये ३७० जागांसाठी प्रवेश दिला जाणार असून, त्यामध्ये आर्मी-२०८, नेव्ही- ४२ आणि एअरफोर्स-१२० चा समावेश आहे. नेव्हल अकॅडमी येथे चारशे जागांसाठी परीक्षेच्या माध्यमातून प्रवेश दिला जाणार आहे.</p><p>येत्या १८ एप्रिलला महाराष्ट्रात मुंबई, नागपूर या शहरांमध्ये परीक्षा होणार आहे. या परीक्षेसाठी केवळ पुरुष उमेदवारांना संधी मिळणार असून, २ जुलै २००२ नंतर व १ जुलै २००५ पूर्वी जन्मलेले उमेदवार या परीक्षेस प्रविष्ठ होण्यास पात्र असतील.</p><p>आर्मीकरिता शिक्षणाची अट बारावी उत्तीर्ण आहे, तर वायुदल किंवा नेव्हल शाखांसाठी इयत्ता बारावीत भौतिकशास्त्र, रसायनशास्त्र आणि गणित या विषयांतून उत्तीर्ण असणे बंधनकारक आहे.</p><p>परीक्षेचे स्वरूप</p><p>'एनडीए' तसेच नेव्हल अकॅडमीसाठी नऊशे गुणांचे दोन पेपर होणार आहेत.</p><p>गणित विषयाचा पेपर तीनशे गुणांसाठी, तर सामान्य आकलनक्षमतेवर आधारित सहाशे गुणांच्या पेपरचा समावेश आहे. विद्यार्थ्यांना पेपर सोडविण्यासाठी अडीच तासांचा वेळ मिळणार आहे. परीक्षेसाठी निगेटिव्ह मार्किंग आहे.</p>
