<p>नाशिक | Nashik</p><p>कॉलेजरोडवरील डिसूझा कॉलनीत शनिवारी (दि.१६) पहाटेच्या सुमारास कत्तल केलेल्या वृक्षास प्रहार जनशक्ती पक्षाच्या वतीने पुष्पहार अर्पण करून श्रद्धांजली वाहण्यात आली.</p> .<p>अशाप्रकारे गांधीगिरी आंदोलनातून या वृक्षतोडीचा निषेध करण्यात आला.</p><p>शनिवारी पहाटे काही संशयित दुचाकीवरून आले. त्यातील एकाने ट्री-कटिंग मशीन चालवत क्षणार्धात वृक्षाची कत्तल केली. वृक्ष रस्त्यावर कोसळला आणि संशयितांनी धूम ठोकली.</p><p>साधी फांदीसुद्धा न उचलता हे संशयित पसार झाल्यामुळे हा वृक्ष तोडण्यामागे काय उद्देश होता, असा सवाल उपस्थित हाेत आहे. वृक्ष कत्तलीची ही घटना सीसीटीव्हीत कैद झालेली आहे.</p><p>या प्रकरणी महापालिकेच्या उद्यान विभागाच्या पथकाने घटनास्थळी पंचनामा केल्यानंतर दुपारी अग्निशमन विभागाच्या जवानांनी वृक्ष रस्त्यातून बाजूला करत लाकूड जप्त केले. </p><p>याबाबत पोलिसांत गुन्हा नोंद झाला असला तरी निःपक्षपातीपणे तपास करून संशयितांवर गुन्हा दाखल करण्याची मागणी यावेळी करण्यात आली.</p><p>दुचाकी क्रमांकावरून संशयित आणि त्यांना हे कृत्य करण्यास भाग पाडणाऱ्यांचा शोध तातडीने न घेतल्यास यापुढे 'प्रहार' स्टाइलने आंदोलन छेडले जाईल, असा इशारा देण्यात आला आहे. यावेळी प्रहारचे जिल्हाप्रमुख अनिल भडांगे, नितीन गवळी आदी उपस्थित होते.</p><p>उद्यान विभागाचे पाठबळ</p><p>उद्यान विभागाच्या अधिकाऱ्यांचे वृक्षतोडीला शंभर टक्के पाठबळ आहे. वृक्षतोड म्हणजे एकप्रकारे हत्याच असून, त्यामुळे यातील संशयितांवर सदोष मनुष्यवधाचा गुन्हा दाखल करावा.</p><p>- अनिल भडांगे, जिल्हाप्रमुख, प्रहार जनशक्ती पक्ष</p>
