हर हर महादेवाच्या गजराने स्वरतीर्थची सांंगता

नाशिक | प्रतिनिधी

स्वरतीर्थ २०२३ कार्यक्रमात सप्त स्वरांची अनुभूती देत, तालावर डौलत दसककर संगीत परिवारातील सुमारे २०० विद्यार्थ्यांनी दसककर संगीत परिवाराचे गुरु स्वरतपस्वी पंडित प्रभाकर गोविंदशास्त्री दसककर याच्या स्मृतीस व सरस्वतीचरणी आपली संगीतसेवा अर्पण केली. दुसऱ्या सत्राची सांगता रावण रचित शिवतांडव स्तोत्राने झाली. अतिशय अवघड पण स्वर व तालबद्ध गायन, साथीला असलेला वाद्यवृंद व हर हर महादेवाच्या गजराने सभागृह दणाणून सोडले व दोन दिवसायी स्वरतिर्थ कार्यक्रमाची यशस्वी सांगता झाली.

वाद्यांचा झंकार, सुमधुर सुरांचा बहार आणि टाळ्यांच्या कडकडाटासह कालिदास कलामंदिर गेले दोन दिवस संगीतमय झाले होते. दसककर संगीत परिवारातील गुरु पंडित माधव दसककर, पंडित सुभाष दसककर, सौ. अश्विनी दसककर- भार्गव, सौ. कल्याणी दसककर तत्ववादी, सौ. गौरी दसककर अपस्तंब व कु. ईश्वरी दसककर यांच्या विद्याथ्र्यांनी या कार्यक्रमात शास्त्रीय संगीतातील अनेक प्रकार सरगम, पारंपरिक बंदिशी, चतरंग, तराणे, रागमाला तर उपशास्त्रीय प्रकारात अभंग, भजन, पदे तसेच बालगीते, प्रेरणा गीते, देशभक्तीपर गीते, स्तोत्र गीते असे अनेक प्रकार व सुगम संगीताबरोबर हार्मोनियम व सिंथेसायजर शास्त्रीय वादना सह पाश्चात्य संगीत देखील सादर करून रसिक श्रोत्यांची दाद मिळवली.

साथसंगतीला पंडित माधव दसककर व पंडित सुभाष दसककर यांचे हार्मोनियम वादन, ईश्वरी दसककर, सूरश्री दसककर यांचे सिंथेसायजर वादन, तबला वादनाची साथ सुजित काळे, चैतन्य दसककर व संजय दसककर, सारंग तत्ववादी, ओमकार अपस्तंब यांची तर ऑक्टोपॅडवर अभिजीत शर्मा व शुभम जाधव आणि टाळ साथसंगत अमित भालेराव यांनी केली.

दुसऱ्या सत्रात शास्त्रीय गायनासह भजन, निसर्गगीत, प्रार्थना यासह कानडी भजनाने उपस्थितांचे कान तृप्त झाले. याच सत्रात ज्येष्ठ कथक गुरु रेखाताई नाडगौडा, ज्येष्ठ तबलावादक आणि गुरु पंडित जयंत नाईक, ज्येष्ठ तबलावादक व गुरु पंडित गिरीश पांडे तसेच होमिओपॅथी तज्ज्ञ आणि संगीत प्रेमी डॉ. योगेश कुलकर्णी यांचा संगीत क्षेत्रातील बहुमोल योगदानासाठी सत्कार करण्यात आला.

'देशदूत' / 'सार्वमत'चे व्हॉट्सअ‍ॅप चॅनल जॉईन करण्यासाठी येथे क्लिक करा