पतीने केले पत्नीवर धारदार शस्त्राने वार

नवीन नाशिक | प्रतिनिधी | New Nashik

पतीने त्यांच्या पत्नीवर धारदार शस्त्राने वार करून गंभीर जखमी केल्याची घटना संभाजी स्टेडियम समोरील एका बंगल्यात घडली दरम्यान सदर घटनेनंतर पतीला चक्कर आल्याने ते खाली पडले त्यांना दवाखान्यात नेले असता डॉक्टरांनी त्यांना मयत घोषित केले... 

याबाबत पोलिसांनी दिलेल्या माहितीनुसार आशिष कौशिक (अंदाजे वय ६०,रा. शिव बंगला,संभाजी स्टेडियम समोर अश्विन नगर,नवीन नाशिक) यांनी (दि. १६) सकाळी साडेआठ वाजेच्या सुमारास घरातील बेडरूम मध्ये त्यांची पत्नी ज्योती आशिष कौशिक (५४) यांच्यावर धारदार शस्त्राने वार करत गंभीर जखमी केले.

त्यानंतर बेडरूमच्या बाहेर जात आशिष यांनी मुलावरही शस्त्राने वार करण्याचा प्रयत्न केला मात्र  त्यांचा मुलगा आईच्या खोलीत पळाल्याने तो बचावला. दरम्यान बेडरूम मध्ये गेल्यावर मुलाने  त्याची आई रक्ताच्या थारोळ्यात पडलेली बघताच त्याने त्याच्या नातेवाईकांना सदर घटनेची माहिती देत मदतीसाठी बोलावले.

त्यांचे नातेवाईक घरी आल्यानंतर मुलाने  बेडरूमच्या बाहेर येऊन बघितले असता आशिष हे जमिनीवर पडलेले त्याला दिसून आले. दरम्यान आशिष व ज्योती यांना उपचारार्थ खासगी रुग्णालयात दाखल केले असता डॉक्टरांनी आशिष यांना तपासून मयत घोषित केले तर ज्योती यांना उपचारार्थ रुग्णालयात दाखल करण्यात आले.

दरम्यान आशिष यांचा मृत्यू नेमका कशामुळे झाला हे शवविच्छेदन अहवालानंतरच स्पष्ट होईल असे पोलिसांनी सांगितले. याप्रकरणी पुढील तपास वरिष्ठ निरीक्षक युवराज पत्की यांच्या मार्गदर्शनाखाली उपनिरीक्षक किरण शेवाळे,उपनिरीक्षक उत्तम सोनवणे करत आहेत.