<p><strong>लासलगाव । हारून शेख</strong></p><p>करोनाच्या प्रादुर्भावामुळे देशासह विदेशात लॉकडाउन असतानासुद्धा भारतातून एप्रिल ते 14 सप्टेंबर 2020 या कांद्याची 13 लाख 06 हजार मेट्रिक टन कांद्याची निर्यात झाली आहे. </p>.<p>कांदा निर्यातीतून 2,091 कोटी रूपयांची उलाढाल होऊन करोना काळात देशाला परकीय चलन मिळाले. साडेतीन महिन्यांच्या निर्यातबंदीनंतर चालू आर्थिक वर्षात 3 महिन्यांचा कालावधी उरला आहे. आता कांदा निर्यात पुन्हा खुली झाल्याने सन 2018-19 च्या आर्थिक वर्षाची निर्यातीची आकडेवारी पार केली जाण्याची शक्यता या क्षेत्रातील तज्ञांनी व्यक्त केली.</p><p>गेल्या वर्षी करोनाचा प्रादुर्भाव असतानाही कांदा निर्यातीत भरघोस वाढ झाली आहे. गेल्या वर्षीच्या उन्हाळ कांद्याच्या हंगामात 130 टक्के बंपर उत्पादन झाले होते. त्यामुळे मागणीच्या तुलनेत कांद्याचा अधिक पुरवठा देशा-विदेशात होत असल्याने कांदा उत्पादकांना उत्पादन खर्चही निघणे मुश्कील झाले होते.</p><p> कांदा उत्पादकांना दिलासा देण्यासाठी केंद्र सरकारने कांदा निर्यातीला प्रोत्साहन दिल्याने सन 2020-21 या आर्थिक वर्षात एप्रिल ते 14 सप्टेंबरपर्यंत 13 लाख 6 हजार मेट्रिक टन कांद्याची निर्यात झाली होती. त्यातून 2,091 कोटी रुपयांचे परकीय चलन मिळाले आहे.</p><p>यंदा लॉकडाऊनच्या काळात कृषी क्षेत्रातील निर्यात 43.3 टक्क्यांनी वाढ झाल्याने केंद्र सरकारला परकीय चलन मिळण्यास मोठी मदत झाली आहे. यामुळे केंद्र सरकारने आयात-निर्यात धोरणात बदल करताना या गोष्टींचाही विचार करावा, असे मत नाफेडचे संचालक नानासाहेब पाटील यांनी व्यक्त केले.</p><p><em><strong>वर्षनिहाय निर्यात</strong></em></p><p>2018-19 - 21 लाख 84 हजार मेट्रिक टन - 3,469 कोटी</p><p>2019-20 - 11 लाख 50 हजार मेट्रिक टन - 2,321 कोटी</p><p>2020-21 - 13 लाख 06 हजार मेट्रिक टन - 2,091 कोटी (एप्रिल ते 14 सप्टेंबरपर्यंत)</p>
