लॉकडाऊनमध्ये डॉक्टरांशी संपर्क साधायचाय?

अशी करा 'ई-संजीवनी'वर नोंदणी
लॉकडाऊनमध्ये डॉक्टरांशी संपर्क साधायचाय?

मुंबई | Mumbai

राज्यात गेल्यावर्षी लॉकडाउनच्या काळात सुरू केलेल्या ई-संजीवनी ऑनलाइन ओपीडी म्हणजेच बाह्यरुग्ण सेवेला चांगला प्रतिसाद मिळत आहे.

दररोज किमान ३०० रुग्ण त्याद्वारे वैद्यकीय उपचार, सल्ला घेत आहेत. राज्यात आतापर्यंत ३७ हजार ८९१ रुग्णांनी या सेवेचा लाभ घेतला आहे. विशेष म्हणजे जे करोना रुग्ण घरी उपचार घेत आहेत किंवा विलगीकरणात असलेले रुग्णही या सेवेचा लाभ घेत आहेत, असे आरोग्य विभागातर्फे सांगण्यात आले.

करोना संसर्ग रोखण्यासाठी राज्यात गेल्यावर्षी करण्यात आलेल्या लॉकडाउनच्या काळात रुग्णांना घरबसल्या वैद्यकीय उपचार, सल्ला मिळावा यासाठी १३ एप्रिल, २०२० रोजी ऑनलाइन ई-संजीवनी सेवा सुरू करण्यात आली. सुरूवातील संकेतस्थळावरून ही सेवा घेण्याची सोय उपलब्ध होती. त्यानंतर त्याचे मोबाईल ॲपही विकसित करण्यात आल्याने त्याच्या वापरात वाढ झाल्याचे दिसून येत आहे.

ई- संजीवनी सेवा मोफत आहे. या माध्यमातून सामान्य तसेच तज्ज्ञ ओपीडी सेवा सुरू करण्यात आली आहे. राज्यातील सर्व जिल्हा रुग्णालय, उपजिल्हा रुग्णालय आणि ग्रामीण रुग्णालयातील सर्व वैद्यकीय अधिकाऱ्यांची नोंदणी या अॅप्लिकेशनमध्ये करण्यात आली आहे. दिवस ठरवून दिल्याप्रमाणे सर्व वैद्यकीय अधिकारी या सेवेमार्फत रुग्णांना त्यांच्या आजारावर सल्लामसलत करतात.

दररोज सकाळी नऊ ते दुपारी एक वाजेपर्यंत आणि दुपारी १.४५ ते सायंकाळी पाच यावेळेत ही सेवा घेता येते. रुग्णांना व्हिडिओ कॉन्फरन्सिंग आणि चॅटचा वापर करून घरबसल्या वैद्यकीय अधिकाऱ्यांशी आजाराबाबत सल्ला घेता येतो. ई-संजीवनी ओपीडी सेवेमार्फत रुग्णांना सल्ला दिल्यानंतर एसएमएसद्वारे ई-प्रिस्क्रिप्शन रूग्णांना प्राप्त होते. त्याद्वारे रुग्ण जवळच्या सरकारी रुग्णालयात जाऊन औषधे घेऊ शकतात..

ई-संजीवनी ओपीडी सेवेचा वापर घेणे करीता रुग्ण esanjeevaniopd.in या संकेतस्थळाला भेट देऊन डॉक्टरांशी सवांद साधू शकतात. तसेच अँन्ड्रॉइड मोबाइलधारक गुगल प्ले स्टोअरमध्ये जाऊन 'esanjeevani OPD National Telconsultation Service' या नावाने देण्यात आलेले अॅप्लिकेशन डाउनलोड करून त्याचा लाभ घेऊ शकतात, असे सांगण्यात आले.

Latest Marathi News, Marathi News Paper, Breaking News In Marathi, Marathi Batmya Live
www.deshdoot.com