<p><strong>मुंबई । प्रतिनिधी</strong></p><p>शहरी भागात नवीन स्वस्त धान्य दुकान मंजूर करण्यावर 2018 मध्ये घालण्यात आलेली स्थगिती उठवणार असल्याची माहिती अन्न आणि नागरी पुरवठामंत्री छगन भुजबळ यांनी दिली.</p>.<p>नवीन अधिकृत स्वस्त धान्य दुकाने मंजूर करण्याबाबत धोरण, राज्यातील रद्द केलेली स्वस्त धान्य दुकाने, शहरी भागात नवीन दुकानांना देण्यात आलेली स्थगिती आदी विविध विषयांसंदर्भात आढावा बैठक मंत्रालयात झाली. </p><p>यावेळी भुजबळ यांनी ग्रामीण भागात महसुली गावांना लोकसंख्येच्या प्रमाणात नवीन स्वस्त धान्य दुकाने मंजूर करणे तसेच रद्द करण्यात आलेल्या दुकानांसाठी जाहीरनामे काढण्याचे निर्देश दिले.</p><p>शहरी भागात नवीन स्वस्त धान्य दुकानांना देण्यात आलेली स्थगिती आता उठवण्यात येणार आहे. संपूर्ण शहर आणि लगतची उपनगरे यांचा विचार करून शहरातील रास्त भाव धान्य दुकानांची स्थळ निश्चिती करण्यासाठी आराखडा तयार करावा.</p><p> या आराखड्यावर प्रचलित दुकाने, बंद असलेली दुकाने, प्रस्तावित दुकाने अशी सर्व दुकाने प्रथम एकांकासह नोंदवावी, असेही छगन भुजबळ यांनी सांगितले.</p>
