<p><strong>निफाड। प्रतिनिधी Niphad</strong></p><p>निफाड सहकारी साखर कारखाना व रानवड साखर कारखाना चालू गळीत हंगामात कार्यान्वित करुन उपमुख्यमंत्री अजित पवारांनी गतवर्षी विधानसभा निवडणूकीत दिलेला शब्द पाळावा या मागणीसाठी करंजगावचे माजी सरपंच खंडू बोडके यांनी अजितदादांच्या दालनात धडक देत आमरण उपोषण करण्याचा प्रयत्न केला.</p> .<p>मात्र मंत्रालय पोलिसांनी कोविडमुळे अजित पवार यांच्या दालनात उपोषणास प्रतिबंध केला. उपमुख्यमंत्री अजित पवार यांनी तत्काळ दखल घेत माजी आमदार अनिल कदम यांच्या उपस्थितीत खंडू बोडके यांना चर्चेसाठी पाचारण करुन निवेदन स्वीकारत सुमारे दहा मिनिटे चर्चा केली. निफाड सहकारी साखर कारखाना कार्यान्वित करण्यासाठी प्राधान्य देऊन रासाकाची तत्काळ निविदा काढण्याची मागणी मंत्री बाळासाहेब पाटील यांच्याशी लवकरच चर्चा करुन सकारात्मक कार्यवाही करण्याचे आश्वासन खंडू बोडके यांना दिले आहे.</p><p>तालुक्यातील गोदाकाठ परिसरातील ऊस उत्पादक शेतकर्यांच्या व्यथा मांडत इतर कारखान्याकडून सुरू असलेली लूटमार बोडके यांनी अजित पवार यांच्या समोर मांडून विधानसभा निवडणूकीत आपण दोन्ही कारखाने कार्यान्वित करण्याचे दिलेल्या आश्वासनाची आठवण करुन दिली. तसेच शासनाने खास बाब म्हणून निसाकाच्या कर्जाची थकहमी घेऊन दोन्ही कारखाने तालुक्यातीलच सक्षम संस्थाना चालू हंगामात कार्यान्वित करण्याचे निर्देश देण्याची मागणी केली. त्यावर बोलताना अजित पवार यांनी निफाड तालुक्यातील ऊस उत्पादक शेतकर्यांच्या भावना रास्त असल्याचे नमूद करुन करोना संकटामुळे त्याबाबत विलंब होत असल्याचे स्पष्ट केले.</p><p>कारखाने भाडेतत्ववर देण्याचे अध्यक्ष बाळासाहेब पाटील यांच्याशी चर्चा करणार असल्याचे सांगितले. मात्र आपण निफाडकरांना दिलेला शब्द ज्ञात असून निसाका-रासाकाबाबत तातडीने सकारात्मक कार्यवाही करण्याचे आश्वासन यावेळी दिले. माजी आमदार अनिल कदम यांनीही यावेळी शिष्टमंडळासमवेत अजित पवार व सहकारमंत्री बाळासाहेब पाटील यांना महाआघाडीचे सरकार असल्याने कारखाने कार्यान्वित करण्यासाठी राजकारणविरहित साकडे घातले.</p><p>या शिष्टमंडळात शंकर संगमनेरे, शहाजी राजोळे, संदीप टर्ले, देवेंद्र काजळे, समीर जोशी, बाळासाहेब पावशे, दत्तू भुसारे, सागर जाधव, नंदू राजोळे, राजेंद्र राजोळे, नितीन निकम, योगेश बोराडे, नंदू निरभवणे, आप्पा राजोळे, अनिल जोगदंड, बाळासाहेब कानडे, रमजू तांबोळी, नितीन मोगल, रामा शिंदे उपस्थित होते.</p>
