<p>नाशिक | Nashik</p><p>लॉकडाऊन काळातही आपल्या आरोग्याची तमा न बाळगता अखंड सेवा देणाऱ्या सर्व एसटी कर्मचाऱ्यांना कराेनावरील लस दिली जावी, अशी मागणी पुढे येत आहे. त्यावर सरकारने सकारात्मक प्रतिसाद दिला आहे.</p> .<p>सर्व एसटी कर्मचाऱ्यांना सरसकट लस देण्याबद्दल प्रयत्नशील राहू असे परिवहन राज्यमंत्री ना. सतेज पाटील यांनी स्पष्ट केले</p><p>एसटी कर्मचाऱ्यंनी लॉकडाऊन कालावधीत आपल्या आरोग्याची पर्वा न करता कर्तव्य बजावले आहे. परराज्यातील लोकांना राज्याच्या सीमेपर्यंत सोडण्याचे काम केले आहे. </p><p>शिवाय चालक-वाहक वर्गाचा रोज शेकडो प्रवाशांशी संपर्क होत असल्याने इतर वर्गाप्रमाणे सरसकट सर्व एसटी कर्मचाऱ्यांना कोविड १९ ची लस देण्यात यावी अशी, मागणी विविध एसटी कर्मचारी संघटनांनी केली. </p><p>कर्मचाऱ्यांना सरसकट लस देणे आवश्यक असून त्यासाठी नक्कीच प्रयत्नशील आहे, असे आश्वासन ना. सतेज पाटील यांनी दिले आहे. शिवाय तातडीने महामंडळाचे उपाध्यक्ष व व्यवस्थापकीय संचालक शेखर चन्ने व शासकीय आरोग्य विभाग यांना फोन करून कार्यवाहीसाठी सूचितही केले. याबाबत मुख्यमंत्री उद्धव ठाकरे यांना पत्र पाठवून कार्यवाही केली जाईल, असेही आश्वस्त केले.</p> <p>एसटी कर्मचारीही करोनाच्या विळख्यात पडला आहे. आतापर्यंत एकूण ४ हजार २८२ कर्मचाऱ्यांना करोनाची लागण झाली असून त्यातील १०९ कर्मचाऱ्यांचा मृत्यू झाला आहे तर ४ हजार ४६ कर्मचारी करोनावर मात करण्यात यशस्वी झाले आहेत.</p>
