<p><strong>म्हेळूस्के | वार्ताहर</strong></p><p>दिंडोरी तालुक्यातील म्हेळूस्के येथील बनकर वस्तीवर मध्यरात्रीच्या सुमारास बिबट्याने केलेल्या हल्ल्यात तब्बल सात शेळ्यांचा मृत्यू झाल्याची घटना घडली. यामुळे परिसरात घबराटीचे वातावरण पसरले असून रोजंदारी करणाऱ्या कुटुंबावर उदरनिर्वाहाचे साधन हिरावल्याने उपासमारीची वेळ आली आहे...</p>.<p>याबाबत अधिक माहिती अशी की, येथील शेतकरी प्रकाश बनकर यांच्या शेतावर मोलमजुरी करण्यासाठी दत्तू गायकवाड हे आपल्या कुटुंबियांसमवेत राहतात.</p><p>मोलमजुरी बरोबरच संसाराला आधार म्हणून ते शेळीपालनही करत होते. परंतु, मध्यरात्रीच्या सुमारास गोठ्यात बांधलेल्या शेळ्यांवर अचानक बिबट्याने हल्ला केल्याने सहा शेळ्या जागेवरच मृत्युमुखी पडल्या तर एक शेळी बिबट्याने अंधाराचा फायदा घेत अडचणीत नेऊन फस्त केली.</p><p>एक-एक वाढवून सात शेळ्या सांभाळल्या होत्या. पण बिबट्याने हल्ला केल्याने जवळपास पन्नास ते साठ हजार रुपयांचे नुकसान झाल्याने गायकवाड हे हतबल झाले असून मोलमजुरी करणाऱ्या कुटुंबावर असे संकट ओढावल्याने हळहळ व्यक्त केली जात आहे.</p><p>बिबट्याच्या हल्ल्याने वारंवार होणाऱ्या या प्रकारामुळे वनविभागाने तात्काळ बिबट्याचा बंदोबस्त करण्यासाठी पिंजरा लावण्याची मागणी नागरिकांनी केली आहे.</p>
