<p><strong> नाशिकरोड । प्रतिनिधी</strong></p><p>अनाधिकृत वाळू चोरी रोखण्यासाठी नाशिक विभागातील नाशिक, अहमदनगर, धुळे, जळगांव आणि नंदुरबार जिल्ह्यातील टोल नाक्यांवर 24 तास महसूल पथकाची नेमणूक करण्यात यावी. जेणेकरुन या पथकाद्वारे वाळू ठेक्यांवर लक्ष ठेवून वाळू चोरी रोखत येईल, असे विभागीय आयुक्त राधाकृष्ण गमे यांनी महसूल आढावा बैठकित सांगितले. </p>.<p>विभागीय आयुक्त कार्यालयाच्या समिती कक्षात पाचही जिल्ह्यांचा आढावा विभागीय आढावा व्हिडीओ कॉन्फरन्सिंगद्वारे घेण्यात आला. त्यावेळी विभागीय आयुक्त राधाकृष्ण गमे बोलत होते. ते म्हणाले, विभागातील सर्व जिल्हाधिकार्यांनी पाण्याखाली असलेल्या वाळू घाटांचा शोध घेवून पारंपारिक पध्दतीने त्या खाली असलेल्या वाळूचा अंदाज काढून वाळू लिलावाची कार्यवाही पूर्ण करावी. तसेच बेकायदेशीर मार्गाने होणारी वाळू चोरी रोखण्यासाठी टोल नाक्यावर 24 तास महसूल पथके नेमणूक करुन वाळू चोरी करणार्यांवर कडक कारवाई करण्याची सूचनाही गमे यांनी विभागातील जिल्हाधिकार्यांना दिल्या.</p><p>नाशिक विभागातील सर्व दगडखाणींची ईटीएस मशिनद्वारे मोजणी करुन परवानगी पेक्षा जास्त गौण खनिजाचे उत्खनन झाल्याचे आढळ्यास तात्काळ संबंधितांवर कारवाई करुन वसूली करण्यात यावी. जमीन महसूल वसुली शंभर टक्के होण्यासाठी विभागातील सर्व जिल्हाधिकार्यांनी आपल्या स्तरावर प्रत्येक आठवड्याला जिल्ह्याचा आढावा घेण्याची सूचनाही यावेळी गमे यांनी केली.</p><p>नाशिक विभागात सनद वाटपाचे काम समाधानकारक असून सर्व जिल्हाधिकार्यांनी उर्वरीत सदन वाटपाची कार्यवाही मोहिम स्तरावर करावी. बांधकाम परवानगीचे प्रंलबित प्रकरणे, वनहक्क अधिनियम 2005 अंतर्गत प्रलंबित प्रकरणे लवकरात लवकर निकाली काढावीत. तसेच ज्या ज्या जिल्ह्यांमध्ये तलाठी कार्यालय प्रस्तावित केले आहे, अशा ठिकाणी लवकरात लवकर तलाठी कार्यालयासाठी जागा उपलब्ध करुन देण्यात याव्यात, असेही विभागीय आयुक्त गमे यांनी सांगितले.</p><p>यावेळी अपर आयुक्त भानूदास पालवे, उपायुक्त गोरक्ष गाडिलकर, उपायुक्त दत्तात्रय बोरुडे, उपायुक्त अर्जुन चिखले, उपायुक्त प्रविण देवरे, उपायुक्त स्वाती देशमुख, उपायुक्त अरविंद मोरे, सहआयुक्त कुंदन सोनवणे उपस्थित होते. तसेच व्हिडीओ कॉन्फरन्सिंगद्वारे नाशिक येथून जिल्हाधिकारी सूरज मांढरे, मालेगावचे अपर जिल्हाधिकारी धनंजय निकम, अहमदनगर जिल्हाधिकारी डॉ.राजेंद्र भोसले, धुळे जिल्हाधिकारी संजय यादव, जळगांव जिल्हाधिकारी अभिजित राऊत, नंदुरबार जिल्हाधिकारी डॉ. राजेंद्र भारुड उपस्थित होते.</p>
