थिनरने भाजल्याने एकाचा मृत्यू

नवीन नाशिक | प्रतिनिधी New Nashik

विद्युत पुरवठा खंडित झाल्याने मेणबत्तीच्या प्रकाशात गॅरेजचे काम करत असतांना मेणबत्ती( Candle) पडल्याने जवळच असलेल्या थिनरने (thinner )पेट घेतल्याने गॅरेजमध्ये काम करणाऱ्या व्यक्तीचा आगीत गंभीर भाजल्याने उपचारादरम्यान मृत्यू झाल्याची दुर्दैवी घटना अंबड येथे घडली.

याबाबत सविस्तर वृत्त असे कि,कृष्णा राजकुमार विश्वकर्मा (२९, रा. इंडोलाईन कंपनी च्या मागे, अंबड, नाशिक) हे (दि.१) रात्री आठ वाजेच्या दरम्यान त्यांच्या गॅरेजमध्ये काम करत असतांना अचानक विद्युत पुरवठा खंडित झाला. कृष्णा यांनी मेणबत्ती पेटवून त्यांचे काम सुरु ठेवले. दरम्यान मेणबत्ती खाली पडल्याने खाली असलेल्या थिनर ने पेट घेतला यावेळी कृष्णा यांचे दोन लहान मुले देखील तिथेच बाजूला होते त्यांनी देखील वडिलांना वाचविण्यासाठी धाव घेतली असता, ते थिनर मुलांना लागून त्यांना दुखापत न होण्यासाठी त्यांनी दोघा मुलांना लांब ढकलून दिले.

मात्र या सर्व प्रकरणात कृष्णा हे मोठ्या प्रमाणात भाजून जखमी झाले. त्यांना त्यांचा भाऊ पिंटु राजकुमार विश्वकर्मा याने तात्काळ जिल्हा रुग्णालयात उपचारार्थ दाखल केले असता त्यांचा उपचारादरम्यान मृत्यू झाला. या घटनेची नोंद अंबड पोलिस ठाण्यात करण्यात आली असून पुढील तपास पोलीस नाईक उमाकांत टिळेकर करीत आहेत.