<p><strong>नाशिकरोड |प्रतिनिधी </strong></p><p>ड्रेनेजच्या खड्ड्यात ढिगारा कोसळून दबले गेलेल्या दोन मजुरांना अग्नीशमन दलाच्या जवानांनी तासभराच्या प्रयत्नानंतर वर काढले....</p>.<p>वडनरेरोड येथील हांडोरे मळा भागात ही घटना आज सकाळी अकराच्या सुमारास घडली. महापालिकेतर्फे ड्रेनेज लाईनचे काम सुरु आहे. त्याच्या पंधरा फूट खोल खड्ड्यात हे मजूर अडकले होते.</p><p>नाशिकरोड परिसरात जलवाहिनी, ड्रेनेजची कामे गेल्या काही दिवसांपासून सुरु आहेत. या खड्ड्यात पडून तसेच मातीवरुन रात्री-अपरात्री वाहने घसरुन अपघात होत आहेत. महापालिकेने कामे त्वरीत पूर्ण करावीत अशी मागणी होत आहे.</p><p>अग्नीशमन अधिकारी अनिल जाधव, फायरमन उमेश गोडसे, शाम काळे, प्रकाश कर्डक, संजय पगारे, बाजीराव कापसे, आर. बी. जाधव, सदाशिव तेजाळे यांनी ही मोहिम राबवली.</p><p>नगरसेवक केशव पोरजे यांनी घटनास्थळी धाव घेत गर्दीवर नियंत्रण मिळवत मदत केली. या भागात ड्रेनज लाईनचे काम सुरु आहे.</p><p>त्यासाठी सुमारे तीस फूट लांब व पंधरा फूट खोल खड्डा खोदण्यात आला आहे. आज सकाळी अकराच्या सुमारास त्यात दोन मजूर उतरले होते.</p><p>वरचा ढिगारा ढासळून मजूर गाडले गेले. नागरिकांनी तातडीने अग्नीशमन दलाला फोन केला. महापालिका अधिकारी तसेच नगरसेवक केशव पोरजेही दाखल झाले होते. खड्ड्यासाठी जेसीबी तेथे अगोदरपासूनच होता. त्याच्या तसेच टिकाव व फावड्याच्या मदतीने माती बाजूला करुन तासाभरानंतर मजूरांना कर्मचा-यांनी बाहेर काढले. ते जखमी झाले होते.</p>
