<p><strong>नाशिक | प्रतिनिधी </strong></p><p>शहरातील मध्यवर्ती बस स्थानक (सीबीएस ) जवळील एका हॉटेलच्या खोलीत बुधवारी (दि.१३) सायंकाळी एका २१ वर्षीय युवतीचा मृतदेह आढळून आल्याने खळबळ उडाली. याप्रकरणी युवतीसोबत असलेल्या प्रियकराला पोलिसांनी ताब्यात घेतले आहे....</p>.<p>तन्मय प्रवीण धानवा (२१, रा.मासवन, कोळीपाडा, पालघर) असे ताब्यात घेतलेल्या संशयिताच्या नाव आहे. तर अर्चना सुरेश भोईर (२०,रा. कल्लाले मान, बोईसर) असे खून झालेल्या युवतीचे नाव आहे. </p><p>हे प्रेमी युगुल नाशिक येथे मुक्कामी आले होते. दरम्यान, बुधवारी संध्याकाळी पाच वाजता तन्मय व अर्चनाचे आई,वडीलांसह अन्य नातेवाईक हॉटेलमध्ये अचानकपणे आल्याने त्यांची भांडणे झाली. </p><p>यावेळी हॉटेलचे व्यवस्थापक व अन्य कामगारांनी धाव घेतली. यावेळी खोलीतील पलंगावर अर्चना मृतावस्थेत आढळून आली व तन्मय येथील एका कोपऱ्यात बसलेला होता.</p><p>याबाबत व्यवस्थापकाने पोलिसांना माहिती दिली. काही वेळेतच सरकारवाडा पोलिसांचे पथक घटनास्थळी दाखल झाले. </p><p>त्यांनी अर्चनाला तपासून बघितले असता ती मयत झाल्याची खात्री पटली. यावेळी पोलिसांनी तिच्यासोबत थांबलेल्या तन्मयला चौकशीसाठी ताब्यात घेतले आहे. </p><p>दरम्यान, पोलिसांनी प्रथमदर्शनी अर्चनाचा तोंड दाबल्यामुळे मृत्यु झाल्याचा संशय व्यक्त केला आहे. प्रियकर तन्मय यास पोलिसांनी अटक केली आहे. सरकारवाडा पोलीस ठाण्यात रात्री उशिरापर्यंत गुन्हा दाखल करण्याचे काम सुरु होते.</p>
