<p><br><br>नाशिक । दि.9 प्रतिनिधी<br>महानगरपालिकेच्या चार विषय समिती सभापती पदाची निवडणुक उद्या (दि.10) महापालिकेत होत असली तरी यातील महिला बाल कल्याण, विधी समिती व वैद्यकिय सहाय्य व आरोग्य अशा तीन समिती सभापती पदासाठी </p>.<p>अनुक्रमे स्वाती भामरे, कोमल मेहरोलिया व पुष्पा आव्हाड याचे एकमेव अर्ज दाखल आहे. यामुळे हे तीन सभापती बिनविरोध निवडले गेले असुन त्यांच्या नावाची औपचारिक घोषणा करणे बाकी आहे. </p><p>दरम्यान जिल्हाधिकारी तथा निवडणुक अधिकारी सुरज मांढरे यांच्या अध्यक्षतेखाली उद्या (दि.10) ही विषय समिती सभापती व उपसभापती निवडणुक प्रक्रिया होणार आहे.</p><p><br>गेल्या आठ महिन्यापासुन रखडलेल्या महापालिकेच्या विषय समिती सभापती निवडणुक उद्या दिवसभरात वेगवेगळ्या वेळेत होणार असुन यासंदर्भातील तयारी नगरसचिव विभागाकडुन करण्यात आली आहे. </p><p>या महिला बाल कल्याण, विधी समिती, शहर सुधारणा व वैद्यकिय सहाय्य व आरोग्य या समितींच्या आरोग्य सभापती व उपसभापतीच्या निवडणुकीसाठी गेल्या 1 डिसेंबरपासुन अर्ज वितरण व दाखल करण्याची प्रक्रिया सुरु होती. </p><p>मंगळवारपर्यत यातील महिला बाल कल्याण समिती सभापती पदासाठी स्वाती भामरे, विधी समिती सभापती कोमल मेहरोलिया व वैद्यकिय सहाय्य व आरोग्य समिती सभापती पुष्पा आव्हाड यांचे एकमेव अर्ज दाखल झाल्यामुळे त्यांची बिनविरोध निवड झाली आहे. </p><p>उद्याच्या निवडणुकीत निवडणुक अधिकारी या तीन सभापतींच्या नावाची घोषणा करणार आहे. तसेच महिला बाल कल्याण समिती उपसभापती पदाकरिता मिरा हांडगे, विधी समिती उपसभापती पदासाठी भाग्यश्री ढोमसे, वैद्यकिय सहाय्य व आरोग्य समिती उपसभापती म्हणुन निलेश ठाकरे यांचेही एकमेव अर्ज आल्याने त्यांची निवड झाल्यात जमा असुन उद्या निवडणुक अधिकारी त्यांच्या नावाची घोषणा करणार आहे.</p><p><br>केवळ शहर सुधारण समिती सभापती पदासाठी भाजपच्या छाया देवांग व शिवसेनेचे सुदाम ढेमसे यांचे दोन अर्ज आल्यामुळे या पदाकरिता निवडणुक प्रक्रिया होणार आहे. याच समिती उपसभापती पदाच्या निवडणुकीसाठी अलका अहिरे यांसमोर सुदाम ढेमसे यांचाच अर्ज दाखल आहे. </p><p>यामुळे या पदासाठी निवडणुक प्रक्रिया होणार आहे. या समितीच्या पदांसंदर्भात निवडणुक होणार असली तरी या समितीत भाजपचे बंहुमत असल्याने भाजपचाच सभापती व उपसभापती होणार असल्याचा दावा भाजपने केला आहे.<br><br></p>
