<p><strong>येवला । प्रतिनिधी Yevla</strong></p><p>नाशिक ग्रामीण जिल्ह्याचे पोलीस अधीक्षक सचिन पाटील यांनी जिल्ह्यातील घरफोडीच्या गुन्ह्यांबाबत सविस्तर माहिती घेऊन गुन्हे उघडकीस आणण्यासाठी मार्गदर्शन करून सूचना दिल्या होत्या. </p>.<p>त्याअनुषंगाने अप्पर पोलीस अधीक्षक शर्मिष्ठा वालावलकर व उपविभागीय पोलीस अधिकारी सोमनाथ तांबे यांचे मार्गदर्शनाखाली नाशिक जिल्ह्यातील घरफोडी गुन्ह्यांचा तपास करत असतांना पोलीस निरीक्षक बर्डीकर यांना पाटोदा येवला येथील घरफोडीत सावरगाव येथील आरोपी असल्याची गुप्त बातमी मिळाली होती.</p><p>त्यानुसार ग्रामीण पोलिसांचे पथकाने सावरगाव, येवला शिवारात सापळा रचून संशयित अजय आनंदा लोखंडे, रामा शांताराम लोखंडे दोघे राहणार सावरगाव तालुका येवला यांना २ किलोमीटर पळत पाठलाग करून ताब्यात घेतले. त्यांना पाटोदा येथील घरफोडीची विचारपूस केली असता त्यांनी उडवाउडवीची उत्तरे दिली.</p><p>पोलीस खाक्या दाखवताच त्यांनी गेल्या महिन्यात दि २४ रोजी पाटोदा येथील मोबाईल दुकान फोडल्याची व कोपरगाव येथे मोटारसायकल चोरी केल्याची कबुली दिली. सदर मोबाईल दुकान फोडलेबाबत येवला तालुका पोलीस येथे ०६५२/२०२० भादवी ३८०,४६१ प्रमाणे तसेच मोटारसायकल चोरीबाबत कोपरगाव ग्रामीण पोलीस ठाणे येथे ०४९९/२०२० भादवी ३७९ प्रमाणे गुन्हे दाखल आहेत.</p><p>सदर आरोपी कडून पाटोदा येथील मोबाईल दुकानातील चोरीस गेलेले लावा कंपनीचे २ मोबाईल फोन, आयटेल कंपनीचे ३ मोबाईल फोन असे एकूण ५ मोबाईल फोन, तसेच हेडफोन, मोबाईल बॅटऱ्या, चार्जर, स्क्रीनगार्ड व कोपरगाव ग्रामीण येथील गुन्ह्यात चोरीस गेलेली बजाज कंपनीची काळे रंगाची MH17CJ5564 नंबर असलेली मोटारसायकल व गुन्हा करते वेळी वापरलेली हिरो होंडा कंपनीची काळे रंगाची स्प्लेडर प्लस मोटारसायकल असा एकूण ६३ हजार ४२५ रुपये किमतीचा मुद्देमाल हस्तगत करण्यात आला आहे.</p><p>यावेळी पोलीस नाईक रावसाहेब कांबळे, प्रवीण काकड, भाऊसाहेब टिळे, घुगे, आव्हाड, पटेल यांनी गुन्हे उघडकीस आणून धडक कारवाई केली आहे.</p>
