<p><strong>सातपूर l Satpur (प्रतिनिधी)</strong></p><p>सद्यस्थितीत संपूर्ण शहरासोबतच सातपूर विभागातही कोविड रुग्ण गुणाकार पद्धतीने वाढत आहेत. त्यामुळे सातपूर कॉलनीतील जिजामाता शाळेत विलगीकरण तर ईएसआय हॉस्पिटलमध्ये कोविड सेंटर सुरु करावे, अशी मागणी नगरसेवक सलीम शेख व नगरसेवक योगेश शेवरे यांनी मनपा आयुक्तांकडे केली आहे.</p>.<p>सातपूर हा कामगार वर्गाचा परिसर आहे. कामगारांची घरे अतिशय लहान व एक अथवा दोन खोल्या असलेली आहेत. त्यामुळे कामगारांच्या घरातील एखादी व्यक्ती कोविड बाधित झाल्यास त्यांना होम क्वारंटाईन होणे शक्य होत नाही. त्याचबरोबर खासगी रुग्णालयाचा आधार घेणेदेखील पैशाअभावी अडचणीचे होत आहे.</p>.<p>त्यामुळे सातपूरमधील जिजामाता शाळा या ठिकाणी विलगीकरण सेंटर तातडीने सुरू करावे. तसेच गंभीर रुग्णांसाठी शासनाचे राज्य कामगार विमा रुग्णालय मनपासाठी अधिग्रहित करून त्यामध्ये ऑक्सिजन बेड, व्हेंटिलेटर व इतर आवश्यक सुविधा निर्माण करून कोविड रुग्णांसाठी उपचार देण्यात यावेत, अशी मागणी करण्यात आली आहे.</p>.<p>मनपा आयुक्तांना देण्यात आलेल्या निवेदनावर नगरसेवक शेख,नगरसेवक शेवरे यांच्यासह मनसेचे उपाध्यक्ष सचिन सिन्हा, विजय आहिरे, योगेश लभडे, प्रकाश निगळ, सोपान शहाणे आदींच्या स्वाक्षर्या आहेत.</p>
