<p><strong>नाशिक |Nashik (प्रतिनिधी)</strong></p><p>उच्च शिक्षण संचालनालयाच्या अखात्यारित येणाऱ्या आठ व्यावसायिक अभ्यासक्रमांच्या सीईटी परीक्षांसाठीच्या अभ्यासक्रमात कोणताही बदल करण्यात आला नसून, शैक्षणिक वर्ष २०२०-२१च्या सीईटींसाठी असणारा अभ्यासक्रम यंदाच्या २०२१-२२ या शैक्षणिक वर्षासाठी कायम ठेवला आहे. विद्यार्थ्यांना फटका बसू नये, यासाठी अभ्यासक्रम जैसे-थे ठेवण्याचा निर्णय उच्चशिक्षण संचालनालयाने घेतल्याची शक्यता आहे.</p>.<p>उच्च शिक्षण संचालनालयाचे संचालक डॉ. धनराज माने यांनी याबाबतचे परिपत्रक प्रसिद्ध केले असून, अभ्यासक्रमांची माहिती राज्य सामाइक प्रवेश परीक्षा कक्षाला (सीईटी सेल) कळवण्यात आली आहे. विद्यार्थी व पालकांच्या माहितीसाठी या सविस्तर अभ्यासक्रमांची माहिती सीईटी सेलच्या वेबसाइटवर प्रकाशित करण्यात आली आहे.</p><p>या सीईटींमध्ये विधी तीन वर्षे, विधी पाच वर्षे, बीएड, बीपीएड, बीए बीएड/ बीएस्सी बीएड, एमएड, एमपीएड, बीएड-एमड अशा सीईटी परीक्षा आहेत. या परीक्षा २०२०-२१ मध्ये असलेल्या अभ्यासक्रमांनुसार पार पडणार असल्याची माहिती डॉ. माने यांनी दिली आहे.</p><p>'सीईटी सेल'कडून या अभ्यासक्रमांच्या सीईटी परीक्षा घेण्यात येतात; तसेच त्यांच्या प्रवेशप्रक्रियाही राबविण्यात येतात. त्यामुळे अभ्यासक्रम आणि सीईटी परीक्षांबाबत अधिक माहिती 'सीईटी सेल'च्या वेबसाइटवर मिळेल.</p>
