<p><strong>मालेगाव। प्रतिनिधी </strong></p><p>शहरासह ग्रामीण भागामध्ये ज्याप्रमाणात कोरोनाची रुग्णसंख्या वाढत आहे त्याच प्रमाणात उपाययोजना वाढवून कोविड रुग्णालयातील बेडची संख्या वाढविण्यात यावी. आजच्या घडीला सुमारे 1 हजार 531 रुग्ण गृहविलगीकरणात असून अशा रुग्णांची घरोघरी जावून तपासणी करण्याच्या सूचना राज्याचे कृषी व माजी सैनिक कल्याण मंत्री दादा भुसे यांनी दिल्या आहेत.</p>.<p>येथील शासकीय विश्रामगृहात सर्व विभाग प्रमुखांची बैठक आयोजित करण्यात आली होती. बैठकीला अपर जिल्हाधिकारी धनंजय निकम, अपर पोलीस अधिक्षक चंद्रकांत खांडवी, बाजार समितीचे उपसभापती सुनील देवरे, प्रातांधिकारी डॉ. विजयानंद शर्मा, महानगरपालिकेचे उपायुक्त रोहिदास दोरकुळकर, तहसीलदार चंद्रजित राजपूत, सामान्य रुग्णालयाचे वैद्यकीय अधिक्षक डॉ. किशोर डांगे, तालुका वैद्यकीय अधिकारी डॉ. शैलेश निकम, डॉ. हितेश महाले, डॉ. शुभांगी अहिरे आदी उपस्थित होते.</p><p>गृहविलगीकरणातील रुग्णांमुळे कोरोनाचा प्रादुर्भाव वाढण्याची शक्यता अधिक असल्याचे सांगतांना मंत्री भुसे म्हणाले, पोलीस व महानगरपालिकेच्या कर्मचार्यांचे संयुक्तपणे दहा पथकांची नियुक्ती तात्काळ करण्यात यावी, या पथकांनी गृहविलगीकरणातील रुग्णांच्या घरोघरी जावून तपासणी मोहिम स्वरूपात राबवावी. गृहविलगीकरणाच्या सर्व शक्यता पडताळून आवश्यकता भासल्यास अशा रुग्णांना तात्काळ कोवीड केअर सेंटर मध्ये दाखल करावे. आज जवळपास 76 प्रतिबंधीत क्षेत्र आहेत याठिकाणी सर्व प्रकारच्या उपाययोजनांचे सुक्ष्म नियोजन करावे.</p><p>अधिकार्यांना प्रदान करण्यात आलेल्या अधिकाराचा पुरेपूर वापर करा, गरज भासल्यास कायद्याचा वापर करून गरजेनुसार खाजगी संस्था, रुग्णालये अधिग्रहीत करण्याचे निर्देशही भुसे यांनी यावेळी दिले. गेल्यावर्षी कोरोनावर बर्यापैकी नियंत्रण मिळविण्यात स्थानिक प्रशासनास यश मिळाल्यामुळे सटाणा, मनमाड, नामपूर, चांदवड येथील रुग्णदेखील मालेगाव मध्ये उपचारासाठी येत असल्याने आरोग्य प्रशासनावरील वाढता ताण लक्षात घेता चांदवड येथील ट्रामा सेंटरमध्ये ऑक्सिजन बेड वाढविण्यात यावे. त्याचबरोबर दाभाडी येथील 30 बेडची क्षमता वाढवून 50 पर्यंत न्यावी.</p><p>मनमाड येथील रेल्वे प्रशासनाचे रुग्णालय कोवीडसाठी कार्यान्वित करण्याच्या शक्यता पडताळून पहाव्यात. शहरातील मन्सुरा हॉस्पीटल कार्यान्वित करण्यात यावे. महात्मा ज्योतीबा फुले योजनेतील शहरातील सहा रुग्णालयांचा आढावा घेवून तेथे रुग्णांची व्यवस्था करण्यात यावी असे निर्देशही मंत्री भुसे यांनी यावेळी दिले.</p>
