<p><strong>संगमनेर । Nashik (प्रतिनिधी)</strong></p><p>प्राचीन भारतीय परंपरा असलेल्या योगासनांचा आता स्पर्धात्मक खेळांमध्ये समावेश झाला असून युवा कार्यक्रम व खेल मंत्रालयासह केंद्र सरकारच्या आयुष मंत्रालयाने गुरुवारी दिल्लीत याबाबतची अधिकृत घोषणा केली आहे.</p>.<p>त्यासोबतच राष्ट्रीय योगसन खेळ महासंघाला या खेळाच्या प्रचार-प्रसारासाठी मान्यता देण्यात आली असून राष्ट्रीय खेल, खेलो इंडिया, शालेय खेळ तसेच विद्यापीठ खेळ व राज्य, जिल्हा आणि तालुकास्तरावरील स्पर्धेतही आता योगासनांचा समावेश खेळ म्हणून झाला आहे. </p><p>महासंघाचे आंतरराष्ट्रीय अध्यक्ष योग महर्षि स्वामी रामदेव बाबा व महासचिव डॉ. एच. आर. नागेंद्र यांच्या मार्गदर्शनाखाली पुढील वर्षी पहिल्या आंतरराष्ट्रीय योगासन स्पर्धेचे आयोजन केले जाणार असल्याची माहिती राष्ट्रीय योगासन खेळ महासंघाचे उपाध्यक्ष डॉ. संजय मालपाणी यांनी दिली.</p><p>गुरुवारी (ता.17) दिल्लीत केंद्रीय युवा कार्यक्रम व खेल मंत्रालयाचे राज्यमंत्री श्रीपाद नाईक आणि आयुष मंत्रालयाचे राज्यमंत्री किरण रिजीजू यांनी संयुक्त पत्रकार परिषदेत योगासनांना खेळाचा दर्जा मिळाल्याची अधिकृत घोषणा केली.</p><p>त्यासोबतच या खेळाच्या वैश्विक प्रसार व प्रचारासाठी स्थापन झालेल्या योगासन खेळ महासंघालाही मान्यता देण्यात आल्याचे दोन्ही विभागांच्यामंत्री महोदयांनी जाहीर केले.</p>.<p><em><strong>दोन्ही </strong>विभागांच्या मंत्री महोदयांच्या पत्रकार परिषदेनंतर संगमनेरच्या ध्रुव ग्लोबल स्कूलमधील योगासनपटूंनी योगसनांची नेत्रदीपक प्रात्यक्षिके सादर केली. लवचिक शरीराद्वारे सादर झालेल्या या प्रात्यक्षिकांनी दोन्ही मंत्र्यांलयाच्या प्रमुखांसह उपस्थित अधिकारी व पत्रकारांना मंत्रमुग्ध केले.</em></p><p><em>ध्रुव ग्लोबलचे योगसन प्रशिक्षक मंगेश खोपकर यांच्या मार्गदर्शनाखाली स्कूलच्या सहा विद्यार्थ्यांनी सदरच्या प्रात्यक्षिक कार्यक्रमात सहभाग नोंदवला होता.</em></p>
